Hagtos

Didto sa unahan, ikid kaayog sampot si Letecia samtang naglakaw padulong sa ilang balay. Nag-miniskirt siya. Bisag edaran na siya, 35 anyos, apan mihulma pa gihapon ang kabigot sa iyang lawas. Husto ang gidak-on sa iyang duha ka suso, lingin ug puti ang iyang mga paa, may kandiis ang iyang duha ka aping. Sa matag pahiyom niya, mosamot paglutaw ang iyang katahom kay molubyok ang duha niya ka kandiis. Wa silay anak si Kompare Roman.

Kuyog niya si Abner. Managkauban sila sa gitrabahoang opisina.

“Hoy! Nagbantay ka na sab anang duha, no, Ronnel?”

Naigking ko sa pagkusi ni Nemia, akong asawa, sa akong kilid.

“Wa, uy!” Gihapuhap ko ang akong kilid nga napaknit sa tag-as nga mga kuko sa akong asawa.

“Wa sa imong kagaral! Nganong nia ka na man sab sa bentana? Kada hapon maghuwat ka man gyud anang duha nga mamauli?”

Nakapangawot ko sa akong ulo. Nakapanglingo ko.

“Naluoy lang ko kang Kompare Roman. Maninoy baya siya sa atong kamagwangan. Nagpakabuta-bungol lang siya. Nganong misugot man sab siya nga anha mopuyo sa ila kanang Abner?” “Nag-abang man sab.” “Abang-abang lang na, uy!” Giyam-iran ko ang akong asawa dayon kong biya sa bentana.

Nahinanok na ang akong asawa sa akong tupad sa sulod sa among kuwarto. Apan ako, nagmata lang gihapon bisag lawom na ang gabii. Dakog posisyon ug suweldo si Kompare Roman kaniadto sa gitrabahoang kompaniya. Apan nadisgrasya siya, nabangga ang gimaneho niyang kotse sa poste sa elektrisidad. Kini ang hunungdan nga giputol ang duha niya ka tiil kay maayong pagkadugmok ang mga bukog niini.

Inutil na si Kompare Roman. Anha na lang siya sa ilang balay, giatiman sa ilang hamtong nga suluguon kon wa sa ilang balay si Letecia. Dako ang balay nilang Kompare Roman tungod kay adunahan man sila si Letecia. Managsama silang mga anak og adunahang mga ginikanan. Dautag matris si Letecia ug maong wa silay anak.

Kanunay kong makita sila si Letecia ug Abner nga maghinagkanay ug maggakos sa ilang terrace kon lawom nang gabii, kanang mingaw na ang among lugar sa gipuy-an namong subdivision. Daan na man god kong natahap nga duna silay hilom nga relasyon. Maong nagpaniid ko nila. Unya mokalit lang pagkawala sa terrace ang duha.

Apan lagi, way sekreto nga magpabiling tinaguan hangtod sa hangtod. Kay usa ka gabii niana, nahigmata mi si Nemia tungod sa kusog nga mga buto sa pistola nga naggikan sa balay nila ni Kompare Roman.

Unya kahilom. “Unsay buot ipasabot adto, Ronnel?”

Gikuyawan ang akong asawa. Igo na lang kong nanghupaw.

“Mihagtos na gyud ang pailob ni Kompare Roman!” Mao ra kini ang akong nasulti. Unya, gitugaw na sab ang kagabhion sa laing usa ka buto sa pistola. Nagkatinan-away mi si Nemia. Nangabot ang mga pulis kay dunay nanawag nga silingan. Tulo ka patay nga lawas ang gipagawas sa balay nila ni Kompare Roman. (KATAPUSAN)