Taiheiyo padayong miangkon og ISO certification sa pagduma

Padayong naangkon sa Taiheiyo Cement Philippines, Inc. (TCPI) ang pagpamatuod nga ang integrated

management systems niini tagtamod ug na-uyon sa sukaranan sa International Organization for Standardization (ISO).

Gibag-o sa Certification International Philippines (CIP) hangtud 2021 ang pagpamatuod nga naglangkob sa Quality Management System (QMS), Environmental Management Systems (EMS) og programang Occupational Health and Safety (OHS) sa TCPI.

Tinamod nga accredited certification body sa ISO ang CIP dinhi sa nasud.

Human sa usa ka bug-os nga pag-audit sa miaging tuig, gipamatud-an sa CIP nga nagtuman sa mga kinahanglanon sa ISO 9001:2015 ang QMS niini, sa ISO 14001:2015 ang EMS, ug sa OHSAS 18001:2007 ang OHS sa paghimo’g semento.

“Kanunay natong gihuptan ug gitamod ang mga sertipikasyon sukad pa sa Disyembre 2006,” niingon si Hazel G. Wasawas, internal control and management systems officer sa TCPI corporate affairs division.

Sukad sab sa tuig 2006 nga gihiusa sa TCPI ang tulo ka managlahing sistema sa pagdumala ngadto sa usa ka kinatibuk-ang system nga nakatabang sa pagpadayon sa pagsunod sa mga kinahanglanon sa tulo ka mga sukaranan.

Gikahimut-an ug gipasigarbo ni Kazuhiko Ichizawa, bagong pangulo ug CEO sa TCPI, nga ang kompanya nagpabiling makanunayon uban ang pasalig niini nga motamod sa mga kalibutanong sukaranan sa operasyon niini.

“Kanunay natong ipasalig ang pagtuboy sa kalidad sa atong mga binuhatan isip usa ka kompanya tungod ug alang sa atong mga suki sa Pilipinas ug ingon man sa atong mga hingtungdan,” padayag niya sa mga kawani sa TCPI.

/ TAMPO NGA HULAGWAY ■ MGA KAWANI SA TAIHEIYO: Nagkatapok ang mga kawani sa Taiheiyo Cement Philippnes, Inc. pinangulohan sa ilang tagduma nga si Chiyuki Sugawara (naglingkod, ika-2 gikan sa tuo) alang sa pakighisgut sa mga taga gawas sa nasud nga tigdukiduki nga midangat sa pagkaangkon sa kompanya bag-ong pagpamatuod sa Taiheiyo nga padayong naangkon ang sistema sa pagdumala nahiuyon sa ISO.