Tabal, Poliquit hara ug hari sa SM2SM run

Gibarugan nila ni Cebuana Mary Joy Tabal ug Rafael Poliquit sa Tagum City ang ilang pagkainilog pinaagi sa paglangkat sa titulo sa ilang tagsatagsa ka kategoriya sa 9th SM2SM Run niadtong Dominggo sa SM City Cebu North Open Area.

Si Tabal, kinsa usa ka Olympian, mitali og usa ka oras, 24 ka mga minutos ug 54 ka mga segundos aron dag-on ang women’s 21K division samtang si Poliquit mioras og 1:11:19 aron patigbabawan ang 21K men’s division.

Ang mga nagsunod kang Tabal mao sila si Kristine Hallasgo (1:25:12) ug Christabel Martes (1:30:36) samtang ang mga nagsunod kang Poliquit mao sila si Prince Joey Lee (1:11:45) ug Jeson Agravante (1:12:15).

Sa 21K foreign category, si Jackson Kiprotich Chirchir maoy midaog sa men’s title pinaagi sa oras nga 1:11:15 samtang si Mary Luz Shimizu maoy milampos sa women’s event pinaagi sa oras nga 2:01:11.