TEAM LEBRON MIDAOG; KD MAOY MVP
Gipasutoy sa Team LeBron ang ilang opensa sa 3rd quarter aron pagbangon gikan sa 20 puntos nga pagkalubong ug lupigon ang Team Giannis, 178-164, kagahapon sa National Basketball Association (NBA) 2019 All-Star Game sa Charlotte.
Nagpakatap og 31 puntos si Oklahoma City forward Kevin Durant aron pangulohan ang kadaugan sa Team LeBron ug angkunon ang ikaduha niyang All-Star MVP title. Gikan sa 20 puntos nga biya, ang Team LeB- ron paspas nga nakagukod pinaagi sa sunodsunod nga three-point shots nila ni Golden State Warriors guard Klay Thompson ug Damian Lillard sa Portland Trail Blazers.
Daw sa usa lang ka pamilok, ang Team LeBron nakailog sa labaw, 132-131, pagkahuman sa 3rd quarter.
Sila si Durant, Thompson ug Lillard nakapasulod og unom ka three-point shots matag usa.
Si Thompson niamot og 20 puntos alang sa kadaugan, nidugang og 19 puntos matag usa sila si LeBron James sa LA Lakers ug Kawhi Leonard sa Toronto Raptors samtang nitampo og 18 puntos si Lillard.
Ang Team Giannis gipangulohan ni Milwaukee Bucks supestar Giannis Antetokoumnpo pinaagi sa iyang 38 puntos samtang ninghatag og 20 puntos matag usa sila si Khris Middleton sa Milwaukee ug Poaul George sa Oklahoma City Thunder.
“It’s cool to be out there with some of the best players to ever play the game, and to win an MVP here in front of my family and friends is pretty sweet,” matod ni Durant, kinsa misakmit sab sa All-Star MVP award niadtong 2012.
Ang kadaugan sa Team LeBron maoy nakabaraw sa pagkulit unta og kasaysayan ni Antetokoumnpo isip labing unang dili Amerikano nga magduduwa nga makaangkon sa All-Star MVP award.
“We didn’t win and that’s why I didn’t get it,” matod ni Antetokounmpo.
Wala man tuod niya nakuha ang All-Star MVP award apan napuno sa pagdayeg si Antetokoumnpo.
“He’s got potential through the roof. He’s still producing at an elite level, and it’s scary to see how far he can keep going,” matod ni Durant kabahin kang Antetokounmpo.
“His game is rounding into shape. He’s still getting better, but he’s leading top five, top three MVP candidates right now at 20. How old is he, 23? To be that young and already at the top of the class as one of the elites in the game, it’s a joy to watch his progression.”