Pag-ambush dili lang tungod sa negusyo: pulis
Nakig-alayon ang Mandaue City Police Office (MCPO) sa Toledo City Police Station kalabot sa pagpamanhig sa negosyante nga si John Pearlnel Dinoro niadtong Miyerkules, Pebrero 20.
Ang biktima nitug-an sa kapulisan nga iyang gidudahan nga likod sa pagpamanhig, naa sa dakbayan sa Toledo.
Wala pay igong ebidensya nga makatumbok sa laing negusyante nga maoy gidudahang utok sa pagpamanhig kang Dinoro, hinungdan nga nakig-alayon ang MCPO sa Toledo police alang sa mas lawom ga pakisusi.
Gawas sa pagpaubos sa profiling sa gitumbok nga likod sa pag-ambush kaniya, gitug-an sa hepe sa MCPO nga lakip sa ilang ipaubos sa profiling, mismo si Dinoro.
Matod ni Senior Supt. Julian Entoma, hepe sa MCPO, nga ilang gipalawman ug gipalapdan pa ang gihimo nga pakisusi kalabot sa mga background ni Dinoro ug sa giingong kompetensya niini sa negosyo, nga mao ang pag-supply og sand and gravel sa Toledo.
Gipasuta usab ngadto mismo sa gipasanginlan kon tinuod ba nga aduna silay panagbangi.
Usa sa ilang gitan-aw nga posibleng labaw pa sa negosyo ang nagtuklod sa tinguha nga pagpapatay kang Dinoro.
Gihulagway ni Entoma nga adunay kaya ang nagtinguha sa kinabuhi ni Dinoro.
Dugang ni Entoma nga sa ilang tan-aw mga amateur pa nga gunfor-hire ang ni-ambush niini.
Gawas sa negusyo giangkon ni Entoma nga ila usab tanawon ang kalabot sa kanhi niini trabaho isip drayber ug body guard ni suspendidong mayor sa Toledo, Sonny Osmeña.
Wala usab gisalikway ni Entoma nga ila usab tan-awon kon may kalambigitan ba ang ilegal nga drugas, ug uban pa nga aspeto.