LTO 7 way ayo ang serbisyo
Sa dihang niabot ang mga plate number alang sa mga bag-ong sakyanan nga narehistro niadtong 2016 ug 2017, mi-anunsiyo dayon si Land Transportation Office (LTO) 7 Regional Director Victor Caindec nga gikinahanglan kining ipakuha sa mga tag-iya sa sakyanan ug mga car dealers. Misitar dayon siya og deadline ug ultimatum nga ipakuha niadtong Pebrero 16. Kay ang dili makakuha sa maong tagal, multahan na kon madakpan.
Morag man og kilat ni si Caindec. Maayo na siya karon moisyo og deadline dalang panghulga gumikan kay anaa naman sa iyang mga kamot ang maong mga plaka. Apan niadtong mga miaging tuig, sa dihang nangita og naningil na ang car owners, wala siya makahatag. Naghuwat og pila ka tuig ang mga tag-iya og sakyanan. Iyang gitumbok ang ilang main office ug lagda sa Commission on Audit (COA) nga maoy nakalangay.
Nganong mag-iningon man si Caindec ani? Mora man og iyang gihulga ang car owners? Nganong di man siya makahatag og konsiderasyon ug igong lugway nga makakuha ang car owners? Daghang rason nganong di makakuha sa iyang gi-imponir nga deadline. Posibleng ang uban wala makadungog sa anunsiyo sa media o sa social media. Dili baya tanang tawo maminaw sa radyo ug mobasa og newspapers. Labi pa sa social media. Daghan ang wala magapil-apil anang Facebook.
Unya tiaw mo na, nag-apura siya, unya sa distribution o releasing sa iyang mga tawo, wala magkadimao. Sama sa paglukat og lisensiya nga puwerteng taasa ang linya ug maghuwat ang mga aplikante og pipila ka oras, mao gihapon ang nahitabo sa pag-release sa mga bag-ong plate numbers. Inig adto sa tag-iya o representante, dili dayon mahatag ang plate number sa hingtungdan gumikan kay utingkayon pa sa personnel gikan sa nagtipun-og ug nagli-undok nga plate numbers. Bisan ang car dealers mga gitahasan sa ilang mga clients naglisod. Kuhaon lang ang cellular number sa clients ug textsan. Tan-awa ra og unsa ka hasol.
Ambot og nahibalo ba kaha si Caindec sa problema ug sa di maayong sistema? Kon wa siya mahibawo, inutil siya. Nganong di man na i-isyo sa mga tag-iya kon mo-renew sila sa ilang registration? Mas hapsay pa kay taas ang panahon. Apurado siya apan way sistema iyang buhatan.