Makalingaw ang Parokya Natò: A Laugh Story
Kon wa ko masayop, si direktor Eric Matti ang nipadayag sa iyang kasagmuyo nga hinay ang kita sa mga pelikulang Tagalog karong tuiga. Pero kining giingong dakong kita sa pelikula nila ni Liza Soberano ug Enrique Gil nga Alone/Together basin mao nay makaputol sa morag kadena nga kahinay sa takilya sa lokal nga mga pelikula.
Giingong dunay international screenings ang pelikula sa Dubai ug Abu Dhabi ug gani nilupad na man ang duha alang niining maong katuyoan. Hinaut magpadayon ang interes sa mga makisine sa lokal nga mga salida.
Ning nanglabay nga mga bulan o tuig, akong namatikdan nga kugihan na kaayo ang Viva Films mohimog pelikula di sama sa una nga mohimo kinig pelikula matag karon ug unya ra.
Gani sa sunod bulan, duha gyud ka pelikula ang ipasundayag: una, ang Ulan nga gibidahan ni Nadine Lustre ug Carlo Aquino uban nila ni Marco Gumabao ug AJ Muhlach ug ipasundayag sa Mar. 13; ug, ikaduha, ang Sons of Sabel diin si Ai-ai delas Alas ang bida uban ang X-Battalion ug gitakdang ipasundayag sa Mar. 27.
Gawas sa nahisgutang pelikula, magpagawas usab ang Spring Films sa Kuya Wes nga gibidahan nila ni Ogie Alcasid ug Ynes Veneracion sa Mar. 13. Samtang ang Star Cinema mopasundayag usab sa pelikulang Eerie nga gibidahan ni Charo Santos ug Bea Alonzo sa Mar. 27.
Nakabantay mo nga parehas ang petsa sa pagpasundayag sa Ulan ug Kuya Wes ug sa samang higayon, parehas usab ang petsa sa Sons of Sabel ug sa Eerie?
Gituyo ni o sulagma lang? Hinaut nga parehas nga tan-awon sa mga makisine ang maong mga pelikula bisan kon dungan ang ilang pagpasundayag.
Usa ko sa mga naghinamhinam nga makasaksi sa musical play nga Parokya Natò: A Laugh Story nga giapilan sa mga artista sa komedyang programa nga Bubble Gang ug gipangulohan ni Michael V.
Daan na man ning sikat nga mag-aawit si Michael V gawas sa pagkamaayong mopakatawa. Nagtoo ko nga di tanan sa Bubble Gang parehas og abilidad ni Michael V.
Mao nga nakugang ug nahimuot ko nga nakakita ug nakadungog nila ni Kim Domingo, Chariz Solomon, Valeen Montenegro, Antonio Aquitania, Paolo Contis, ug ubang cast nga nikanta ug nisayaw pa sa tablado.
Moyukbo ko sa nakahatag sa ideya nga ipasundayag ang Parokya Natò: A Laugh Story sa Cebu. Hinaut nga may mosunod pa. Kon ibalik kini, motan-aw gihapon ko. Nalingaw god ko!