Gahi tambagan

Dear Papa Joe,

Tawga ko sa ngalan nga Jegz, taga Tagbubunga, Villaba, Leyte. Kining akong suliran kabahin ni sa akong amigo tawgon ta lang ngalan nga Glendo.

Naglisod na ko’g adjust ani niya kay gahig ulo. Minyo na ni siya unya usa ko sa gikuha niya nga sponsor sa kasal. Kauban mi sa trabaho diri sa Saudi Arabia. Ang problema karon kay naa siya’y esmiringhoy nga OFW ra pod. Ako tambagan nga magtarong siya, ang tubag niya, di daw siya kabuwag aning iyang kabit karon kay nagbahad nga magpakamatay. Pero nagduda ko nga di ni magpakamatay ang babaye kay basin nga sila na sa akong amigo.

Nahimo pa sa babaye nga mo fling sa laing lalake ug nag send pa gani og bastos nga larawan. Ang ako ra pong amigo ang nakasakop sa maong hitabo. Ako na pud siyang ingnon nga buwagi na kay di lagi na magpakamatay apan di jud siya mobuwag kay hadlok lagi siya nga magpakamatay ang babaye.

Unsa may akong buhaton ani? Gigahian na ko sa iyang ulo. Basin madapog ko pa ni siya hinuon.

JEGZ Jegz,

Iyaha nanang problema ug di kapugos niya nga ikaw ang sundon. Kitang mga higala, pwede ta motambag pero di nato pwede ipugos kon di mabugto ang inyong panaghigalaay. Basta kay tambag lang. Kon magmagahi siya, sagdi siya kay moabot ang panahon nga maningil na niya iyang binuhatan.

Basin nabutaan na siya sa babaye. Basin lahi na ang bayhana kay sa iyang asawa para niya. Ang imo lang pahimagno nga di niya ikalain, kana lang ug daghang salamat.

PAPA JOE

(sa inyong tampo ipadala lang sa papajoesuperb@ gmail.com)