Bisan asa, Spencer andam ni Pacquiao

Samtang pasensiyado nga nagpaabot si Manny Pacquiao sa desisyon ni Floyd Mayweather Jr., laing Amerikanhon ang mipadayag sa iyang kaandam nga makibinukbokay sa eight-division champion sa bisan asa nga dapit.

Si Errol Spence Jr., ang kasamtangang naghupot sa International Boxing Federation (IBF) welterweight king, mipabuhagay nga bisan dinhi sa Pilipinas dili niya balibaran si Pacquiao.

“I’ll fight Manny Pacquiao anywhere, definitely in the Philippines and anywhere else,” matod ni Spence sa interview sa mga boxing writer didto sa Estados Unidos.

Hinuon si Spence nalakip sa mga pilianan ni Pacquiao nga iyang makontra sunod niyang away sa higayon nga dili gyud makig-rematch kaniya si Mayweather.

Ang fighting senator mao usab ang naghupot sa World Boxing Association (WBA) regular welterweight title.

Iyang gikonsiderar nga makigaway og laing dekalidad nga kontra ug hingpit na gyud mapapas ang paglaom nga maaway niya og balik si Mayweather, kinsa mipildi kaniya sa una ni lang panagsangka niadtong 2015.

Sama kang Mayweather, si Spence ubos usab sa Premier Boxing Champion ni Al Haymon nga mao na usab karon ang promoter ni Pacquiao.

Apan aron makabaton og kahayag ang tinguha ni Spence kinahanglan una niyang impresibong pildihon ang dekalibring si undefeated Mexican-American fighter nga si Mikey Garcia karong Marso.

“Right now I’m worried about Mikey Garcia after that you can ask me all the questions on Pacquiao,” padayag ni Spence.

Laing world champion nga anaa sa listahan ni Pacquiao mao si Keith Thurman (29-0, 22KOs), ang naggunit sa WBA superwelterweight title.

Si Thurman, sa sayo pa, daan nang mipadungog nga naghuwat ra gyud siya sa tawag sa kampo ni Pacquiao.

Sama kang Spencer, si Thurman andam makigtakos ni Pacquiao sa bisan asa nga dapit ug bisan kanus-a.

“I’d be willing to negotiate a fight for anytime he deems fit -- summer, after the summer, September, October. I think it would be a great fight for the sport. Let’s make it happen. When’s the last time Pacquiao fought an undefeated fighter?,” ingon ni Thurman.

Si Pacquiao, sa niaging mga adlaw mipadayag nga makigaway siya bisan ni kinsa, apan iyang prayoridad si Mayweather.