NIÑOS MITIPI SA CEBU PROVINCE

Cviraa secondary football final game

Sa tinguha nga makabawi sa masakit nga kapildihan sa niaging tuig, ang Cebu City Ninos kagahapon mipakitang og lig-ong determinasyon ug mibuntog sa Cebu Province, 2-0, aron langkaton ang kampiyonato sa football event sa Central Visayas Regional Athletic Association (Cviraa) sa St. Louis School Don Bosco football field sa Dumaguete City.

Gilangkuban sa mga tinunan sa University of San JoseRecoletos (USJ-R) nga giabagan sa usa gikan sa University of San Carlos ug laing duha sa Abellana National School, ang Cebu City sayong mipahait sa ilang opensa sa diahng si Angelo Colina naka-goal sa unang 10 minutos sa duwa.

Ang headcoach nga si Rommel Ramirez nga ang kauhaw aron makabalik sila sa Palarong Pambansa maoy nakadugang sa ilang kadasig sa maong panag-engkwentro tali sa mga Sugboanon sa finals.

“Wa man gud mi madala sa national sa niaging tuig, mao nga amo gyud ni karong gipanguha. Gusto gyud sa mga bata nga makaadto sa Palarong Pambansa,” matod ni Ramirez.

Dihay pagsuway sa Cebu Province nga makatabla apan ang hugot nga depensa ug ang laing goal ni Christian Agot sa katapusang 15 minutos maoy nag-inat sa labaw sa Cebu City, 2-0, nga sa samang higayon nagduot sa paglaom sa Cebu Province.

Apan dili tanan kasagmuyo maoy naangkon sa Cebu Province kagahapon human nga ang ilang secondary boys’ volleyball team milangkat sa korona sa dihang ilang gipukan ang Bohol Province sa tulo ka sets, 25-19, 25-22, 25-13, sa duwa nga gipahigayon sa Foundation Preparatory Academy Gym.

Kini maoy nagputol sulod sa usa ka dekada alang sa Cebu Province nga makaangkon og gold medal sa maong regional meet sa maong event.

Mga opisyal sa Department of Education (DepEd) misaysay sa Sun.Star-Cebu nga katapusang nakaangkon ang Cebu Province og gold medal sa volleyball event niadto pang 10 ngadto sa 11 ka tuig ang nakalabay.

Ang Cebu City, sa laing bahin, malampuson usab nga nakadepensa sa girls’s secondary volleyball batok sa host Dumaguete City, 25-23, 25-16, 2513, didto sa Asian College Gym.

Hangtod ning pagsulat, ang kasamtangang overall champion nga Cebu City daw og sa nag-ung-ong na usab sa ilang ika-26 nga pagdepensa sa overall champion. Sa medal tally kagahapon sa udto, aduna na kini 35 ka gold medal, 28 ka silver medals ug 39 ka bronze.

Ang secondary team mitali na usab og 27 ka gold medal samtang sa elementary nakakadlit na usab kini og walo ka gold.

Nagsunod ang Bohol Province (30-26-25), dayon ang Dumaguete City (25-27-24), Tagbilaran City (20-13-10) ug Cebu Province (15-13-31).

Motapos ang kompetisyon karong adlawa.