KONSEHAL SA SAN FERNANDO NGA MITAGO GIPATAY

Si San Fernando Councilor Alfonso Donaire IV, kinsa nagtago-tago sud sa hapit usa na ka buwan, gipusil patay sa wa mailhing mga tawo sud sa usa ka balay sa lungsod sa Ramon Magsaysay, Zamboanga del Sur, Sabado sa buntag, Pebrero 23.

Usa ka pulis nga nadestino sa operations desk sa Zamboanga del Sur Provincial Police Office (ZDSPPO) kinsa niuyon nga mohatag og impormasyon basta di lang siya nganlan, nikompirmar sa Sunstar Cebu nga si Donaire gipatay mga alas 6:30 sa buntag sa Sabado, Pebrero 23.

Pasiunang imbestigasyon nagpakita nga wa mailhing mga tawo gikatahong ningsud sa balay ni Donaire ug ningpusil kaniya sa makadaghang mga higayon.

Ang pulis nidumili hinuon sa pagbutyag pa og dugang mga impormasyon tungod sa mando sa ZDSPPO kalabot sa pagpagawas og mga impormasyon ngadto sa media.

Si Donaire, kinsa nailhan sab nga si Kwati, mao ang ikaupat nga piniling opisyal sa San Fernando nga gipatay sa nakalabay nga duha ka mga buwan.

Si Donaire, uban kang Councilor Edwin Villaver, wa na mopakita pa sa lungsod human sa kamatayon nila ni Konsehal Reneboy Dacalos, kanhi Association of Barangay Councils (ABC) president Johnny Arriesgado ug sa nipuli kaniyang si ABC president Ricardo Reluya Jr.

Si Reluya namatay sa ambush, nga nikalas usab sa laing duha nila ka mga staff.

Naangol ang iyang asawa nga si Mayor Lakambini "Neneth" Reluya ug ilang security escort. Sila giingong naa sa deathlist. Nagtuo si Mayor Reluya nga pulitika ang motibo sa pagpatay, di illegal drugs./