Backpack idili sa rali sa PDP Laban

Gibana-bana nga moabot sa 60,000 ngadto sa 100,000 ka mga tawo ang gipangandaman sa kapulisan sa Police Regional Office (PRO-7) nga modugok sa sud ug gawas sa Plaza Independencia, sa dakbayan sa Sugbo, Dominggo sa hapon hangtod sa gabii, Pebrero 24.

Kini sa kalihukan sa PDP Laban , diin motambong si Presidente Rodrigo Duterte.

Ang kalihukan tambungan di lang sa mga sakop sa partido lukop probinsya sa Sugbo uban na sa ilang mga supporters, anaa usab ang pipila nga magpapili sa pagka-Senador.

Hinungdan nga gipahibalo sa director sa PRO-7, Chief Supt. Debold Sinas, nga nasabutan nila sa Presidential Security Group (PSG) nga idili ang mga backpack sud sa Plaza Independencia.

“Una, among gipahibalo tanan sa publiko, and we have agreed with the organizer, nga bisan kinsa, bisan media, organizer, absolutely no backpack. Pwede ra bag nga ginagmay, mga shoulder bag, sling bag, kay kon naa moy backpack, dili gyud mo pasudlon. And the PSG strictly instructed us nga wala gyud backpack, labi na magtuyok-tuyok sa sud,” gipahibaw ni Sinas.

Gilantawan nga ala una pa lang sa hapon, mag-abot-abot na ang mga tawo kay magsugod ang programa sa alas 3 sa hapon.

Gitug-an ni Sinas nga niadto pa lang Byernes, secured na ang tibuok lugar, uban na sa ilang pakig-alayon sa PSG.

Gipahimutang na usab ang kinahanglang pwersa kapulisan, kasundaluhan, uban pa nga law enforcement unit, ug K9 unit.

Anaa usab ang upat ka mga barko sa Philippine Coastguard nga naka-patrolya ug nagbantay sa kadagatan duol sa venue.