520 nasikop, 9 napatay, P31M drugs nasakmit
Moabot na sa 520 ka mga tawo ang nasikop, atol sa 30 ka oras pa lang nga pagpahigayon sa Synchronized Enhanced Managing Police Operation (SEMPO) sa Police Regional Office(PRO-7).
Samtang siyam ang napatay, og moabot sa P31 milyones nga balor sa mga nagkadaiyang ilegal nga drugas, lakip na marijuana ug Ecstasy ang mga nasakmit.
Mokabat sa P9 milyunes nga marijuana ang naibot sa kapulisan ug Philippine Drug Enforcement Agency (PDEA) 7 sa Gaas, Balamban.
Ang 48 ka oras nga SEMPO, gisugdan niadtong Huwebes sa alas 12 sa kaadlawon, Pebrero 21 ug tapuson alas 12 sa kaadlawon, Pebrero 24.
Ang gihatag nga data sa PRO-7 kutob pa lang alas 6 Sabado sa buntag, Pebrero 23.
Gitug-an ni Police Regional Office director, Police Chief Supt. Debold Sinas nga 194 ang nasikop tungod sa kalambigitan sa ginadili nga drugas, 139 buy bust, 15 sa pagpatuman sa
warrant of arrest, ug lima sa search warrant.
Sa mga nasikop, 13 kanila street level ug ang uban newly identified personalities, apan duha nasuta nga mahimo nga high value target (HVT).
Adunay siyam nga napatay, upat kanila giingong ningsukol atol sa buy bust, usa niini si Ken Kenneth Rosales, kinsa naila nga dakong Ecstasy supplier sa Sugbo.
Laing napatay sa buy bust sila si Marvin Veloso, alyas ‘Labad’ sa barangay Looc, dakbayan sa Mandaue.
Ang Cordova Police Station nitala usab og duha ka patay nga sila Librador Abayan ug naila lang nga ‘Moises’.
Samtang ang laing napatay giingon nga nisukol atol sa papatuman sa search warrant, naila nga sila Christorhey Montiadora sa Daanbantayan ug Leonedis Barcelona sa syudad sa Carcar.
Si Barcelona nakuhaan og P4 million nga shabu.
Ang laing tulo sa dakbayan sa Sugbo nga mao sila si Reynaldo Laguna ug Renato Gocong, diin giingon nga naangin ang asawa nga si Emma. (Basaha ang lahi nga estorya sa pahina 2).
Atol sa pinusilay, nasamdan usab si PO3 Pacheco Pulgo.
Samtang 136 ka mga tawo ang nasikop pinaagi sa pagpatuman sa warrant of arrest, diin upat niini naa sa most wanted nga listahan, nalakip na usab i ang 15 ka mga may labot sa ginadiling drugas.
Moabot og 128 ang mga nasikop sa illegal gambling.
Aduna usay gipahigayon nga tulo ka mga operasyon sa illegal fishing, duha sa probinsya sa Sugbo ug usa sa lalawigan sa Bohol, diin 14 ka mga tawo ang nasikop.
Atol sa buy bust, adunay 11 ka mga armas ang nasakmit.
Gihimo usab ang lain pa nga operasyon sama sa Comelec checkpoint, diin adunay 33 ka mga tawo ang nasikop ug nakuhaan og armas.
Kinse usab ang nasikop atol sa pagpatuman sa search warrant kalabot sa pagtinir og armas nga way lisensya, apil na niini ang duha ka mga kapitan sa syudad sa Sugbo. /