Dul-an 30 ka toneladang basura nakuha gikan sa sapa

Dul-an 30 ka tonelada sa mga basura ang nahipos sa cleanup drive sa Bulacao River kagahapon, Sabado, Pebrero 23.

Ang pangu sa Cebu City Environment and Natural Resources (CCENRO) nga si kanhi konsehal Nida Cabrera nibutyag nga kasagaran sa klase sa mga basura nga ilang nakuha mao ang mga plastic, gamit sa panimalay, mga patay nga hayop ug uban pa.

“Plastic gyud halos tanan, mga gamit sa balay nila, mga daan nga sinina mga banig, bisag unsa nalang lagi gipanglabay, mga patay nga iro,” sigon ni Cabrera.

Adunay lima ka estasyon ang Bulacao river ug gitumbok nga labing hugaw ang Lower Torre Inayawan, Upper Torre Inayawan ug Bulacao footbridge.

Gitabangan kini og limpyo sa di mo minus 2,000 ka mga volunteers gikan sa nagkalain-laing mga organisasyon.

Si Julius Niel Avila, 20, usa ka student volunteer gikan sa Saint Paul College, nipadayag nga ang kalihukan maanindot nga lakang para mahibalik ang kalimpyo sa Bulacao river.

“Nindot siya nga experience. Maayo sad siya nga naa’y ingon-ani kay para makatabang ta sa atong kalikopan. Being a youth, good start siya sa mga mosunod sa atong kamanghoran puhon. Importante kaayo nga malimpyo ang atong mga sapa kay hinatag ni sa Ginuo kay obiglado sab ta nga ato ning ampingan,” matod ni Avila.

Malipayon sab nga mipadayag sa kaugalingong kasinatian Ronnie Labura, miyembro sa Alpha Kappa Rho.

“Maayo siya, atleast nakatabang mi sa Bulacao, napakita namo sa katawhan nga dili lang gubot-gubot among ngan sa Akhro, kundi naa sad mi community service. Ang tanan Akhro diri sa Cebu among gi-usa diri tanan. Apil sab sa among plano nga sa sunod nga clean-up drive nga ipahigayon nila mo suporta gihapon mi,” pasabot ni Labura.

Si Cabrera nibutyag nga 14 ka buok establisemento ang ilang nasuta nga adunay kalambigitan sa ilegal nga pagpanglabay og basura sa Bulacao river.

Ilang nadiskobre nga usa niini mao ang mga garbage hauling services. Ang unom sa establisemento gipamulta og P1,000 sa paglapas sa ordinansa, mitabang sab sila sa pagpanglimpyo sa sapa.

Nibutyag si Alfred Turmon, 59, usa ka residente nga dugay nang nagpuyo duol sa Bulacao footbridge nga lakip ang poultry ug piggery farm ang hinungdan sa nakapahugaw sa Bulacao river, hilabi na pud ang mga iresponsable nga residente nga namuyo sa ilahang lugar.