OKC MINGPUKAN SA JAZZ SA 2 O.T.

Napasulod ni Paul George ang iyang running floater nga itsa sa nahabiling 0.8 segundos sa ikaduhang overtime aron agakon ang host Oklahoma City Thunder sa grabe ka kutas nga kadaugan batok sa Utah Jazz, 148-147, kagahapon sa National Basketball Association (NBA).

Sa katapusang posisyon sa bola sa Thunder, si George kalit lang milusot sa depensa sa duha ka mga magduduwa sa Jazz aron itira ang nakapadaog niyang puntos.

Sa return play, desperadong miitsa sa three-point land ang usa sa mga tirador sa gawas sa Jazz nga si Kyle Korver apan sipyat.

Gipangulohan ni George ang Thunder pinaagi sa iyang 45 puntos samtang kuyaw sab nga nakaduwa si Russell Westbrook ug nagpakatap kini'g 43 puntos, 15 rebounds ug walo ka assists.

Si Westbrool na-fouled out sa nahabiling 1:09 minutos sa premirong overtime hinungdan nga naputol ang iyang sunodsunod nga pagmugna og triple-doubles sa 11 ka duwa. Nakakompleto og three-point play ang usa sa mga sinaligan sa Thunder nga si Jerami Grant aron tablahon ang duwa, 129129, sa nahabiling 27 segundos sa regulation period.

Nagpahugtanay og depensa ang duha ka mga kampo human niini ug napupos ang oras sa regulation period nga wala'y nakadugang og puntos hinungdan nga napugos ang premirong overtime.

Ang tip-in shot ni Rudy Gobert sa Jazz sa nahabiling 33 ka mga segundos sa premirong overtime maoy nakatabla na sab sa duwa, 139-139.

Naghinugtanay na sab sa depensa ang duha ka mga kampo hinungdan nga napugos ang ikaduhang overtime.

Katapusang nakatilaw sa labaw ang Jazz, 147-146, pinaagi sa duha ka freethrows ni Gobert sa nahabiling 1:10 minutos sa ikaduhang overtime.

Taodtaod sab nga walay nahimong puntos ang duha ka mga kampo una niabot sa mga kamot ni George ang bola alang sa iyang nakapadaog nga puntos.

Ang Jazz gipangulohan ni Donovan Mitchell pinaagi sa iyang 38 puntos samtang niamot og 26 puntos si Gobert.

Ang Thunder mingsaka sa 38-20 nga rekord ug miphugot sa ilang paggunit sa ikatulong dapit sa Western Conference samtang ang Jazz nangatagak sa 32-26 nga rekord.

/ AP PHOTO ■ 2 OVERTIME: Si Paul George maoy nahimong bayani sa OKC Thunder human niya napasulod ang iyang floater sa nahabiling 0.8 segundos sa ikaduhang overtime nga maoy nagpukan sa Utah Thunder kagahapon sa NBA.