GANTI SA MAKATUDLO P1.8 MILLION NA

Gikatakdang mohatag og P1 million nga ganti ang kagamhanan sa dakbayan sa Lapu-Lapu alang sa daling kasulbaran sa brutal nga pagpatay kang Cristine Lee Silawan, kinsa napalgang patay sa usa ka luna sa Sitio Mahayay, Brgy. Bankal, dakbayan sa Lapu-Lapu niadtong Lunes sa kadlawon.

Ang maong kantidad nahukman sa kagamhanan human ilang nakita nga sobra ra ang gihimo sa mamumuno kang Christine Lee. Mao kini ang unang higayon nga nahitabo sa dakbayan ang mao nga matang sa linuog nga pagpatay.

Matod ni Lapu-Lapu City Mayor Paz Radaza nga ang maong kantidad adto mapunta ni bisan kinsa nga adunay matampo sa kasulbaran sa kaso, lakip na unya ang pagkasikop sa mamumuno.

“Grabe gyud ang gibuhat wala gyud makontento nga gipatay, iya pa gyung gikuan ang bata unya daghang tusaktusak. Mao bitaw tong nadugay og dala sa balay kay ang pag-imbalsama sa iyaha gitahi man ang tanan nga mga pagtusok-tusok sa iyaha. Lain gyud kaayo ba nga panghitabo,” matod ni Radaza.

KAPITOLYO

Si Bise Gobernador Agnes Magpale niingon nga mo-sponsor siya og resolution nga magcharge og P200,000 sa Provincial Council for the Welfare and Children sa sunod nga Provincial Board regular session sa Lunes, Marso 18.

Ang pundo gamiton nga ganti ni bisan kinsa nga makahatag og impormasyon sa mga killer ni Christine Lee.

Sa miaging adlaw, ang Police Regional Advisory Council nigahin usab og ganti nga P100,000 alang sa samang katuyoan.

Usa ka Amerikanhong si Don Davis, retiree nga nagbase na karon sa Leyte, nagtanyag usab og P500,000 aron madakpan, mataral sa hukmanan ug makombikto ang mga mamumuno.