USA SA ‘KILLERS NAILHAN’

GIINGONG MAY KASONG MURDER, ARMADO; LAPU POLICE NAG HOT PURSUIT

Nailhan na sa kapulisan sa Lapu-Lapu City Police ang usa sa mga suspek sa pagpatay kang Christine Lee Silawan.

Ila kining gihulagway nga “armed and dangerous”, dunay kasong murder.

Kini ang gipahibawo ni Sr. Supt. Limuel Obon, director sa Lapu-Lapu City Police Office (LCPO), human kombinsido na sila sa identity sa suspek.

Aduna nay mga tracking team sa Special Investigation Task Group (SITG) Cristine Lee nga nagpahigayon og hot pursuit operation.

Di man tuod mokompirmar si Obon nga hinigugma ni Christine Lee ang suspek, gibutyag niya nga kini tawo nga adunay komunikasyon ni Christine hinungdan nga posibleng nagkaila sila.

Maguwang usab kini og edad sa biktima.

Ang suspek gihulagway ni Obon nga “armed and dangerous,” adunay pending warrant of arrest sa kasong murder ug usa sa mga most wanted sa Kabisay-an.

Di usab kini lumad nga taga dakbayan sa Lapu-Lapu ug giingong adunay kahibawo sa trabaho ug lihok sa mga pulis mao daling nakatago.

Wa pa usab kasibat sa Sugbo ang suspek bisan kon base sa ilang monitoring, wa na kini sa Lapu-Lapu City sukad sa Miyerkules sa buntag.

EBIDENSYA LIG-ON?

Gihulagway ni Obon nga ligon ang ilang ebidensya batok sa suspek nga ilang gigukod karon human sa ilang pakisusi sa CCTV footage sa lugar.

Nakita sa CCTV footage nga nakit-an si Christine nga gipasakay og motorsiklo ug gikompirmar sa usa ka saksi nga giingong nakakita sa pagpatay kang Silawan.

Nanghinaot si Obon nga ang pagkasikop unya niining suspek mailhan usab unya ang mga kauban.

Gitug-an sa director nga tulo ang ilang gidudahang nibuhat sa brutal nga krimen niadtong Lunes sa kaadlawon, Marso 11.

“Kinokompara ko ito (investigation) sa isa ka sickness. Before you will go to the medication part, kailangan i-diagnose nimo. Tapos nami sa diagnostic test. We have already 50 percent medication. We have are now on hot pursuit operation. We have already identified the suspect,” matod ni Obon.

DI PATYON

Samtang gibutyag ni Obon lakip usab sa ilang susihon sa pagkakaron kon ang brutal nga pagpatay kang Silawan

adunay kalambigitan usab sa dakbayan sa Danao niadtong Enero, diin usa ka mag-uuma gipatay ug gipanitan usab ang nawong.

“Wala kaming order na shoot to kill. We wanted him to be arrested alive, ang ako gani giingon sa akong mga tawo if he will fire upon, you cover and if you have to return fire, dito lang sa mga extremes. We want him to face the public unless talagang ang aking pulis ay na corner na like he has to retaliate, that’s the only time that he will use lethal force. Pero instruction is to catch him alive“pagpasabot ni Obon.

Samtang giawhag usab ni Obon ang publiko nga dili mopakatap ug sayop nga mga balita kalabot sa identity sa suspek o pagkasikop na niini pinaagi sa social media sanglit ug di kini gikan sa SITG Cristine Lee o niya mismo.