Pamilyang Silawan may hangyo sa netizens
Petsa sa lubong sa lawas ni Christine Lee Silawan, 16, sabutan pa sa tagtungod sa pamasin nga adunay taas nga opisyal nga moduaw sa haya sa ilang balay sa Barangay Mactan, Lapu-Lapu City.
“Basin naa pa bay opisyal sa taas (Malacañang) ang moanhi unya ba. So, dili pa mi kakuan sa lubong,” pahibawo ni Lousiline Silawan, 21, maguwang ni Christine.
Di sab makakompirmar ang pamilya sa tabi-tabi nga moduaw si Presidente Rodrigo Duterte sa haya.
Giputos sa puti nga habol ang nawong ug tibuok lawas ni Christine sud sa lungon nga maoy makita niadtong mosud-ong sa batan-ong biktima sa linuog nga krimen.
Ang pamilya nanawagan sa netizens nga di bugal-bugalan ang hulagway sa lawas ni Christine pinaagi sa paghimo og memes ug pag-post og fake news nga nagpatuo nga update sa kasong pagpatay ni Christine sa social media.
“Way respeto sa among side. Kon kamo ang pamilya sa biktima, unsay ma-feel ninyo?” asoy ni Lousiline.
Sila nihangyo nga undangon ang pagyaga-yaga sa biktima ilabi na nga nagbangutan sila sa panghitabo.
Ang inahan nga si Lourdes, 48, mapasalamaton sa mga tawo nga niabag aron nga makatigom og reward money, ingon man niadtong mitunol og hinabang pinansiyal.
“Ang pinaka-importante namong hangyo nga mahatagan og hustisya ang gidangatan sa akong anak,”pulong ni Lourdes.
Samtang ang mga classmate ug adviser ni Christine Lee nga tinun-an sa Grade 9, Section MA sa Maribago National High School nipahinungod og pag-ampo sa di pa sila magsugod sa ilang klase.
Diha na sila sa social media nasayod sa hitabo.
Mga magtutudlo ug classmates nanuaw sa haya.
Si Mary Ann Aron, adviser sa Section MA, nihulagway kang Christine nga maayo sa klase, hilumon ug manggiuwawon.
Si Allyka Alegre, classmate ni Christine, wa makapugong sa iyang emosyon samtang naghandum sa dihang buhi pa kini.
Siya maoy nibanos og tupad sa nabakante nga desk nga kanhi gilingkuran ni Christine kay nangahadlok ang uban niyang classmates nga motupad.
“Hinaot nga dili na siya maglatagaw, peaceful na unta siya karon,” mensahe ni Alegre.