Unod sa tawo gikaon?

Wa pay gihuptan nga ebidensya ang kapulisan sa probinsya sa Sugbo nga ang nipatay sa usa ka mag-uuma sa bukirang barangay sa Danao nga gipanitan usab ang dagway konektado sa pagpatay sa dalaga sa siyudad sa Lapu-Lapu.

Dunay nadawat nga mga estorya nga mga sakop sa kulto ang tulo ka mga magsuon nga ningpatay kang Trinidad Roble Batucan.

Giingon nga ang magsuon nikaon sa unod ni Batucan nga ilang gilaplap.

Matod ni Cebu Provincial Police Director Sr. Supt. Manuel Abrugena nga nag-abag na sila sa imbestigasyon sa Lapu-Lapu City Police Office alang sa pagpangita sa killers ni Christine Lee Silawan.

Wa usab nila wad-a ang posibilidad nga ang naghimo sa Danao City mao ra usab ang killer ni Silawan tungod kay susama og estilo.

Di pa makompirmar ni Abrugena nga mga sakop sa usa ka kulto ang magsuong Bueno nga suspek sa pagpatay ni Batucan sa sitio Agutayan, Barangay Lawaan.

Pulos tabi-tabi lang sa mga residente sa bukid nga ang gihimo sa magsuong Bueno ritual sa ilang kulto, diin ang parte sa lawas nga ilang gihiwa ilang kan-on.

“Yes, Sir, ito po yung kumakalat na balita. But we still have to confirm these and allegedly quote “after dismembering yung mga muscles nang victims kinu-consume nila,” matod ni Abrugena.

Una kining insidente nga nasugatan ni Abrugena diin ang ilang gipatay gipanitan ang nawong hangtod sa dughan.