TOLEDO CITY MAY MGA ‘GHOST’ NGA EMPLIYADO?
Ang Kagamhanan sa Dakbayan sa Toledo giingong nigamit sa pampublikong pundo balor og P210 milyunes ubos sa “Clean and Green” program aron ibayad sa giiingong ghost employees sa 2018.
Tungod niini, naaghat si manlalaban Pablo John “PJ” Garcia sa pag-request sa Office of the Ombudsman-Visayas sa pagsusi sa disbursement sa Siyudad sa pundo ubos sa pagdumala ni Mayor John Osmeña.
Uban sa 21 sa 38 ka mga barangay kapitan sa Toledo City, si Garcia niadto sa Ombudsman niadtong Martes, Marso 12, aron iduso ang request sa pag-imbestigar sa hayan plunder sa pampublikong pundo. Sila si Garcia ug Osmeña, uban kang kanhi Pinamungahan mayor Geraldine Yapha, magtigi sa pagkarepresentante sa ikatulong distrito sa Sugbo.
Si Garcia niserbisyo sud sa duha ka mga termino isip kongresista sa third district, sa 2007-2010 ug 2010-2013.
Si Garcia nihangyo sa Ombudsman sa pag-imbestigar kanila ni Osmeña, executive assistant Justin Anthony De Jesus, Acting City Budget Officer Gethsemane Mahinay, City Administrator Ferdinand Marquez, City Treasurer Leonardo Rivera, Councilor Marjorie Perales, Councilor Leo Dolino ug Ex-officio Councilor Ophelio Dolino.
Nihangyo usab siya alang sa ilang preventive suspension.
“I am requesting an investigation kay lisod man pagkuha og documents. It’s good that
some concerned citizens provided me with documents. We will need the power of Ombudsman,” sulti ni Garcia.
Sa 2018, sumala sa reklamo, ang Kagamhanan sa Toledo dunay tulo ka supplemental budgets (SB) alang sa Clean and Green gilakip.
Ubos sa SB 2, mokabat sa P70 milyunes ang gigahin alang sa programa; ubos sa SB 7, P60 million; ug ubos sa SB 8, P80 million. Giaprobahan ang mga budget bisan kon ang Commission on Audit (COA) nipahimangno sa Kagamhanan sa siyudad kalabot niini.
Sa iyang annual audit sa 2017, ang COA nakabantay sa kadudagan ug irregular nga disbursement sa kapin P100 million nga pampublikong pundo isip bayad sa job order ( JO) nga mga kawani.
Matod sa taho sa COA: “The necessity of hiring JO employees could not be established due to lack of contracts and doubtful daily time records of most job orders doing the fieldwork, thus the regularity and propriety of expenditures totaling P113,265,231.40 could not be ascertained. In addition, some JO personnel hired did not perform piece of work or intermittent job of short duration and services rendered exceeded six months.”
Ning tuiga, ang Kagamhanan sa Toledo City mopatuman gihapon sa programa.
Sa iyang request sa pag-imbestigar, si Garcia niingon nga ubos sa Clean and Green program, dunay mga opisyal sa Toledo City lakip sa executive assistant to the mayor, city administrator ug pinili nga mga konsehal ang nag-nominate og JO nga mga kawani aron bayran og tag P350 matag adlaw. Sila giingong gitahasan sa pagtrabahho sa clean and green sa nagkadaiyang mga barangay.
Sa katapusang quarter sa 2018, si Garcia niingon, ang nagkadaghang basura ug kahugaw sa siyudad nakaaghat sa pipila ka mga lumolupyo sa pagpangutana ngano, bisan sa gigahin nga pundo, ang siyudad pabiling hugaw, ang mga basura wa mahakot ug way makitang mga JO nga nanglimpyo sa mga barangay.
Mao usba kini higayuna dihang siya nakadawat og mga dokumento nga may kalabutan sa Clean and Green program ug nagkompirmar nga ang programa gidesinyo aron tikasan ang kagamhanan.
Sa iyang pagtubag sa pasangil ni Garcia, si Osmeña niingon: “Fake news. It’s an indication of his desperation. In fact, in 2008, Pablo John filed a case just like he did now against his ally now, who is (kanhi Toledo City Mayor Arlene) Zambo. In 2008, he filed a case against Zambo that is the same as the case he is filing now.”
Sa laing interbyu, si City Accountant Ramon Samper, niingon nga siya ni-process sa mga transaction tungod sa mga request sa mga buhatan.
“We work in behalf of all departments. We do pre-audit since it is COA that does the post-audit. If there is a complaint, it’s COA that addresses it,” siya niingon.