Ghost employees sa Toledo?

Midangop karon ngadto sa Ombudsman-Visayas si Pablo John “PJ” Garcia, kandidato pagka-kongresista sa ikatulong distrito sa Sugbo, aron ipa-imbestigar kon unsa ka tinuod kining kadudahan nga pag-disburse og pundo ubos sa buhatan ni Toledo City Mayor John Osmeña. Sa iyang reklamo, si Garcia, uban sa 21 ka mga barangay kapitan, mibutyag nga moabot sa P210 milyones ang nabayad sa dakbayan ngadto sa mga ghost employees sa “Clean and Green” program sa dakbayan sa niaging tuig.

Sa alegasyon ni Garcia, nga pipila ka mga opisyal sa Toledo City lakip na ang executive assistant sa mayor, city administrator ang mipili og mga JO employees nga gisuweldohan og P350 ang matag adlaw.

Sa mga dokumento nga iyang nakuha, matod niya, kini nagpakita nga sagad gipang-awat diay ang mga pirma nga anaa sa payroll.

Buot pasabot nga dunay wa mantrabaho apan gisuweldo-an ug duna usay gipangbayaran aron lang mopirma sa payroll nga wa motrabaho, pasabot ni Garcia.

Ang maong budget giaprobahan bisan pa man og aduna na kini pahimangno gikan sa Commission on Audit (COA).

Apan, si Osmeña, sa iyang bahin, nangulipas sa pasangil ug mihulagway sa maong reklamo nga usa ka fake news ug pamulitika lang ilabi na ning naghinangat nga eleksiyon.

Dunay punto si Osmeña sa iyang pangagpas, kay mag-atbang man sila ni Garcia sa umaabot piniliay uban ni kanhi Pinamungajan mayor Geraldine Yapha.

Pero may pulitika man o wala angayan lang usab hatagan ni Osmeña og husay ang mga molupyo sa dakbayan sa Toledo kalabot niini kay naglambigit man kini og buhis sa katawhan.

Mao usab kini ang tukmang higayon nga malimpiyohan ang iyang pangalan sa mga pagduda sa dili pa siya hingpit nga mobiya pagka mayor sa Toledo, kay kon dili, labing siguro makuhaan ang pagsalig sa mga tawo ngadto kaniya.