Niloog nga pagpatay

Kinsa man ang mipatay kang Christine Lee Silawan, ang 16 anyos nga dalaga nga nakit-an na lang nga wala nay kinabuhi niadtong miaging adlaw didto sa dakong wanang sa sitio Mahayahay, Barangay Bangkal, LapuLapu City? Nganong giingon man ato siya sa pagpatay? Unsa man kaha ang motibo sa iyang pagpatay? Gugma? Selos? Personal nga kabangi-an o na-tripingan lang siya?

Mao kini ang pipila ka mga pangutana ug tanghaga nga naglimen sa brutal nga kamatayon sa dalagita. Ug ang atong mga awtoridad lamang ang makatubag niini kon ila kining seryosohon sa pag-imbestigar. Mailhan ug mataral sa hukmanan unta ang mga kriminal. Si Christine, kinsa nagserbisyo sa simbahan sa parokya sa Pajac, Lapu-Lapu City, nakit-an nga nagbuy-od sa yuta niadtong Lunes sa kadlawon nga wala nay underwear ug gilaplap ang nawong. Naka-angkon siyag 30 ka samad dinunggaban. Sus, wala gyud nakonsensiya ang naghimo sa maong krimen. Wala pa masuta sa autopsy report kon nalugos ba ang biktima. Kon wala pa unta ang iyang senina nga iyang gisul-ob sa wala pa siya mawala nianang Domingo sa gabii, lisud na siyang mailhan sa iyang inahan.

Matod pa milakaw ang dalagita niadtong Domingo sa hapon aron mo-serbisyo sa simbahan. Nagtarong siyag pananghid sa iyang inahan. Apan gabii na lang wala pa kini mopauli. Gipangita sa iyang inahan entiro gabii apan wala gyud makit-i. Dihay kuyog ang dalagita nga iyang kauban sa simbahan sa maong lugar kay nangaon silag balot nianang ngitngit na. Kanang maong lugar maoy kasagaran anha mag-date ang mga manag-uyab sa kay ngitngit unya medyo awa-aw.

Apan milakaw ang kuyog makadyot kay dunay gibalik sa simbahan. Pagbalik sa maong lalaki sa lugar, wala na si Christine didto. Halapad ang maong lugar og ngiob. Wala kaayoy mga lumolupyo. Gidagit kaha si Christine? O didto ra panamastamasi og patya sa maong lugar? Ngangong gilaslas man gyud ang iyang nawong? Para nako dili na normal og pangutok ang tawo o mga tawo nga naghimo niini.

(bobbygnalzaro@ gmail.com)