Di na virgin

Dear Noy Kulas,

Tagoa lang ko sa ngan nga Tess. Mag 28 years old na ko karong tuiga ug kaslon na before the end of the year. Mao ni ang akong problema karon.

Ang akong uyab conservative kaayo nga pagkalalake. Ambot nganong wa ni siya magpari nga unta, kahibawo ko nga kaya kaayo niya kay grabe ka buotan ug religious. Tungod ni sa upbringing ug influence sa iyang mama niya.

Believe it or not, Noy Kulas, sa among four-year relationship, wa siya maka-kiss nako sa lips kay sa aping ug agtang ra kay naglikay siya nga matintal ming duha sa pre-marital sex. Bitaw, ingon pa niya virgin pa siya kay di siya ganahan makasala. Kay nahadlok lagi ko nga mawagtang siya kay pangitaon kaayo ni nga klase sa lalake karong panahuna, nagpatuo kong virgin ko bisan dili na.

Yes, di na ko virgin kay twice, nakuha ko sa akong first boyfriend when I was 18. Human adto, wa na ko makig-sex og lain kay mahadlok kong tilawan na lang sa mga lalake kay lisod baya mahigugma na ka, sakit ang biyaan ka ug pag move on.

Mao ni ang akong problema karon kay basin, human sa among kasal, iyang ma-discover nga di na ko virgin. Ako ba kaha siyang sultihan o di nga duna nay lalakeng nakauna niya. Kon ako siyang sultihan, di kaha siya masuko ug biyaan ko? Please tambagi ko, Noy, kon unsa ang akong buhaton.

TESS

Tess,

Sa kaniadto pa lang unta, nag-honest n aka niya. Imo na unta siyang gisultihan nga di ka na virgin. Nga duna nay lalake nga nakahilabot kanimo ten years ago. Niadto pa unta, imo nang nasukod usab kon unsa ka lig-on ang iyang gugma diha nimo. Kay ang tinudanay nga gugma di magsapayan kon unsa ang kagahapon sa usa ka tawo nga iyang gimahal.Di magbase sa hymen ang pitik sa iyang kasingkasing. Bisan ibutang ta nga di na niya mahibaw-an kini kay dugay na kadto nga kasinatian ug mahimong matago, apan mas maayo unta nga imo siyang gisultihan kaniadto pa.

Kon buot usab hunahunaon, way bisan kinsa nga tawo ang nanag-iya sa kagahapon sa iyang minahal. Ang iyaha mao ang karon ug ugma, kana kon magkadayon o magka forever.

Sultihi siya sa tanan aron dinhi pa lang, mahibaw-an na nimo ang iyang reaction. Dinhi pa lang, masukod mo unsa ka lig-on ang pundasyon sa iyang gugma diha kanimo. Be strong kon unsa man ang mahitabo human niini. Kon lig-on ang iyang gugma diha nimo, at least, iyang makita nga ikaw honest.

NOY KULAS