For once in my life
OLIVER PEPITO FLORES (Katapusan sa pito ka mga gula)
Naluoy gyud ko sa akong igsuong bayot. Wa ko makatingog. Pagkadako ra ba sa iyang paghigugma kang Randell?
“Nakadesisyon na ko, sister Ate, mobalhin kog eskuwelahan aron di ko makita kanunay si Randell. Maka-move on ra tingali ko.”
Nagsigeg pamahid si Roilen sa iyang mga luha sa gikuptan niyang panyo. Wa ko makahibawo kon unsay akong buhaton niadtong tungora. Apan bahin sa akong gibati, di ko kalimdan ang akong kaugalingon, nalipay gyud ko nga love sab diay ko ni Randell. Apan unsaon na man lang si Roilen? Di ko gusto nga ako ang hinungdan sa kapakyasan sa iyang gugma.
“Sa laing bahin, sister Ate, nalipay sab ko nga ikaw ang tinuod nga love ni Randell. At least wa siya mapunta ngadto sa laing girl.”
“Laki lang siya, Roi, laing tawo. Samtang kita magsuon. Ikaw ang akong pilion.”
“Sa di pa tika tubagon ana, sister Ate, tug-ani ko sa tinuod. Love mo ba sab si Randell?”
Nakatan-aw ko pag-ayo sa akong igsuon. Naglisod ko pagtubag. Gipalabi ko na lang ang pagpakahilom.
Mikupot si Roilen sa akong kamot.
“Ang wa mo pagtubag, sister Ate, timailhan nga love mo sab si Randell. Don’t worry, mosabot ko. Kalipay ko man sab ang imong kalipay.”
Migakos ko kang Roilen. Ako na sab ang naghilak. Gihapuhap ni Roilen ang akong bukubuko.
“I love him, too, Roi.” Gikuptan ni Roilen ang duha ko ka abaga ug iya kong gipaatubang kaniya. Nagsmile na siya aning higayona. Iyang gipislit ang akong aping.
“Smile, sister Ate. You deserve to be happy. Nahigugma ka na gyud.”
“As I’ve said, Roi, ikaw ang akong pilion. At least for once in my life nahigugma na ko. Pero sa gikaingon ko na, laki lang siya, laing tawo, compare nimo nga ako gyung igsuon.” Nanglingu-lingo si Roilen. “No, sister Ate. Follow your heart.”
Sa pagpanglabay sa mga adlaw, malipayon na si Roilen. Kanunay ming magkuyog ug magkuptanay sa kamot. Misamot kalig-on ang among pagminahalay isip magsuon. Sa tan-aw ko niya, hingpit na siyang naka-move on.
Apan ang dakog kausaban sa iyang kinabuhi mao nga di na siya bayot. Usa na gyud ka lalaki. Ug duna na siyay girlfriend. Samtang kami si Randell, malipayon sa among pagminahalay. (KATAPUSAN)