Barangay kagawad gipatay

Borongan City, Eastern Samar - Patay ang usa ka barangay kagawad ning dakbayan nga gipusil sa riding in tandem, alas 7:45 sa gabii, Martes, Marso 12, sa dan E. Cinco, Barangay C.

Giila ang biktima nga si Jim Viñas Sr., 72, kagawad sa Barangay C.

Matod sa mga nakakita, usa ka lalake nga nagsul-ob og jacket nga may hood ang nipusil kang Viñas.

Gamit sa gunman ang kalibre .45 nga pistola.

Dugang sa mga saksi, human sa hitabo dali nga nisibat ang gunman sakay sa usa ka motorsiklo nga gimaneho sa kauban niini.

Ang drayber posibleng mao usab ang lookout sa pagpamusil.

Wa hinuon makamay-ong sa gunman ug drayber ang mga saksi. Gidala pagdali sa Eastern Samar Provincial Hospital si Viñas sa pamasin nga maluwas pa.

Apan samtang gitambalan, nabugtoan sa kinabuhi.

Base sa pagsusi, nakaangkon og duha ka mga samad pinusilan sa ulo si Viñas nga hinungdan sa iyang kamatayon.

Gisusi sa kapulisan ang posibleng motibo sa krimen.

Daghan ang nagtuo nga basin og may labot kini sa pulitika gumikan kay usa ka barangay opisyal.

Apan ang kapulisan di pa mohatag og pamahayag niini.

SUPPORTER GIPUSIL

Samtang sa Ormoc City, usa ka giingong supporter sa usa ka mikandidato pagka mayor gipusil.

Giila ang biktima nga si Roberto Ablen, taga Barangay Buroc ning dakbayan.

Matod sa kapulisan nga gikan sa pulong pulong sa mga Codilla sa barangay Macabug si Ablen.

Alas 12:30 sa tungang gabii, nipauli kini sakay sa iyang traysikol.

Pag abot sa Doña Aurora sa Barangay Ipil, nakabati kini og sunod sunod nga buto sa pistola.

Nakabantay ang biktima nga duna na siyay igo sa paa.

Base sa imbestigasyon, dunay narekober nga unom ka kabhang sa kalibre 9mm nga nagpundok mga usa ngadto sa duha ka metros gikan sa nahimutangan ni Ablen.

Pagsusi sa kapulisan, way bisan usa ka igo sa bala ang traysikol sa biktima bisan sa kaduol sa nahimutangan sa gunman. Gidala sa tambalanan ang biktima ug luwas na kini. JOHN KEVIN D. PILAPIL / Correspondent