MPBL: SHARKS-TIGERS PLAYOFF SUGDAN NA
Cebu City moduwa nga wa ang ilang leading scorer
Sagubangon sa Cebu City Sharks ang usa ka malisod nga tahas nga aduna sila’y agwantahong piang sa ilang pagpakigbatok sa host Davao Occidental Tigers karong alas 9:00 sa gabii sa ilang 1st round playoff series sa Southern Conference sa Maharlika Pilipinas Basketball League (MPBL) Datu Cup sa Rizal Memorial Complex sa Davao City.
Ang Sharks mokombati nga wala ang ilang sinaligang tirador sa gawas nga si Patrick Cabahug.
Si Cabahug, kinsa produkto sa University of the Visayas (UV) Baby Lancers, nakasinati og angol sa iyang wa nga tiil sa usa ka tune-up game sa Sharks batok sa University of the East niadtong Sabado.
“Challenge gyud ni namo. Dili gyud makaduwa si Patrick kay ankle man ang iyang injury,” matod ni Sharks coach Titing Manalili.
“Kinahanglan lang gyud mo-step up ang atong ubang players.”
Dili ikalimod nga mosulod ang Ti- gers sa korte nga grabe ka inilog isip No.1 team sa Southern Conference nga adunay 20-5 nga rekord pagkahuman sa elimination round.
Ang Sharks munasginhawang nakasulod sa playoffs ug nakakompayot pa sa No.8 nga luna bitbit ang 11-14 nga rekord.
“Pero taas man gihapon ang moral sa atong players,” pasabot ni Manalili. Sa pagpadaplin ni Cabahug, ang Sharks mosalig og maayo nila ni William McAloney, Rhaffy Octobre, Jayford Rodriguez ug kanhi MVP sa Cebu Schools Athletic Foundation Inc. (CESAFI) nga si Jaybie Mantilla.
Ang Tigers mosandig sa katakos sa kanhi mga magduduwa sa Philippine Basketball Association (PBA) nga sila si Bonbon Custodio, Mark Yee, ug Leo Najorda. Sa premirong panagsangka sa duha ka mga kampo niadtong Agusto, ang Tigers mingkawras sa Sharks, 71-64.