Mapugngan unta
Gihakop na sa kahadlok ang pipila ka mga lumolupyo sa Dakbayan sa Lapu-Lapu tungod sa linuog nga pagpatay kang Christine Lee Silawan niadtong Lunes sa kaadlawon. Tulo ang killers sumala sa usa ka saksi. Ang usa giingon sa kapulisan nga ila nang nailhan ug nagpahigayon sila og manhunt operation.
Nahitabo ang krimen sa kaadlawon, sa mingaw nga dapit sa Brgy. Bankal nga giingong tambayanan sa mga managhigugmaay.
Dinhi makita ang kamahinungdanon sa pagpugong sa pagkahitabo sa usa ka krimen nga sama ka luog sa gibuhat kang Christine. Gilaplap ang nawong ug gikuha pa ang pipila niya ka organs sud sa iyang ginhawaan.
Upat ka adlaw human sa krimen, wa pay nadakpan ang kapulisan. Bisan gani ang PNP Crime Laboratory naglibog pa giunsa paghimo ang krimen, labina ang paglaplap ug pagtangtang sa pipila ka mga parte sa lawas.
Samtang nakapunting ang tanan sa pag-ila ug paggukod sa mga killer, ang pagpugong nga masubli kining mao nga krimen hayan malimtan. Di lang ra ba responsibilidad sa tagsa ka mga pamilya o ginikanan ang seguridad, ang labing dakong bahin niini iyaha sa kagamhanan. Dinhi, dako og responsibilidad ang kapulisan ug local government unit.
Usa sa mga epektibo ug namatud-an nang makapahadlok o makapaislag sa mga kriminal mao ang kanunay nga pagpatrolya o presensya sa kapulisan sa kadalanan, kada adlaw, 24 oras sa tibuok semana.
Gawas sa kapulisan, angay moabag ang mga barangay sa pagpatrolya, labina sa awaaw nga mga dapit, sama sa lugar diin patya si Christine.
Ang makapahimangod, ang kagamhanan reaksyonaryo, molihok lang kon nahitabo na ang usa ka krimen. Hinaut nga ang kamatayon ni Christine makapahigmata sa kagamhanan sa kahimahinungdanon sa crime prevention.