ROTA SA BARANGAY GUBA, CORDOVA GIBUKSAN SA LTFRB

Biyahe gikan sa Ayala Center Cebu paingon sa bukirang Barangay sa Guba, Dakbayan sa Sugbo ug biyahe gikan sa lungsod sa Cordova paingon sa dakbayan sa Lapu-Lapu i-bidding karong Agusto 23, Biyernes, sa Land Transportation Franchising and Regulatory Board (LTFRB) 7.

Pinaagi sa bidding, mahibaw-an na kon kinsa ang operator nga mopadagan niining mga bag-ong rota.

Mao kini ang gibutyag ni LTFRB Regional Director Eduardo Montealto Jr., kinsa nihulagway nga taas ang demand sa parehong mga rota.

Kasamtangan nga way nagbiyahe nga pampublikong mga sakyanan sa mao nga mga dapit.

Ang gisaligan sa mga lumolupyo sa Barangay Guba ug sa laing duha ka mga kanait niini nga mga barangay, Binaliw ug Agsungot mao ang habalhabal.

Duna lay mobiyahe nga PUJ apan sagad kadto nang mogarahe sa mao nga dapit.

Ang mga PUJ karon kutob lang sa Barangay Pit-os.

Sa Barangay Pit-os anha magtambayan ang mga habalhabal padung sa bukirang mga barangay sa north district sa Dakbayan sa Sugbo.

Sa Cordova, dunay pipila ka multicab nga pasaheroan nga nagbiyahe.

Ang lakang sa LTFRB tipik gihapon sa Public Utility Vehicle (PUV) Modernization Program sa gobyerno, diin modern jeepneys ang managan sa maong mga rota.

Sugod alas 9 sa buntag sa Agusto 23, hangtod alas 2 sa hapon, manawat og letter of intent ang LTFRB 7 alang sa mga

operator o kooperatiba nga nagplano nga mopadagan og mga unit sa maong mga dapit.

Alas 2 sa hapon sa samang adlaw, himuon na ang deliberation sa bidding diin tan-awon ang rekisito sa mga operator kon angay ba i-award sa ilaha ang Notice of Selection.