PAPA GIPATAY; 2 KA GAGMAY NGA ANAK NAKAKITA
GUNMAN ‘MISEGURONG’ MGA BATA DI MAIGO
Love triangle o bangi ang gitan-aw sa kapulisan nga posibleng motibo sa pagpusil patay sa usa ka kanhi
seaman nga nagmaneho sa iyang multicab uban ang iyang duha ka mga anak pasado alas 6 sa Huwebes sa buntag, Agusto 15, 2019.
Giingon nga ang gunman niseguro nga di maangin ang duha ka mga bata dihang gipusil ang ilang amahan sa may sityo Soong 1 , Brgy. Mactan, Dakbayan sa Lapu-Lapu.
Ang kapulisan naglisod pa sa pag-imbestigar sa kamatayon ni Gil Pedida Antonio, 57, taga Gold Mine Residence, Mactan, kay wa ang iyang pamilya dinhi.
Ang duha ka mga bata, 5 anyos nga lalake ug 2 anyos nga babaye, di hapit motubag sa mga pangutana sa mga pulis.
Gitugyan sila sa Department of Social Welfare and Development (DSWD) kay way kabanay nga nikuha kanila.
Matod ni Police Staff Sergeant Ben Sanchez, imbestigador sa Mactan Police Station, si Antonio naghatod sa iyang duha ka mga anak sa tunghaan.
Giingong napiit sa traffic ang multicab nga gimaneho ni Antonio dihang nitupad sa
driver’s seat ang motorsiklong giluwanan sa duha ka mga tawo. Gipusil si Antonio tumong sa nawong.
Tungod kay niabante gamay ang motorsiklo, wa maunsa ang duha ka mga anak sa biktima nga tupad kaniya.
MOTIBO
“Buwag man gud kuno ni sa asawa. Maorag duna silay kasungian kuno. Ato pang sutaon kinsa ang naay lain ani nila, kani mga anak niya. Ato pang gisubay asa ni nga eskwelahan ihatod unta,” matod ni Sanchez.
Gawas sa love triangle, gisubay usab sa kapulisan ang posibilidad nga adunay nagdumot kang Antonio sanglit sa ilang pakisusi, daghan kining nakaaway sa iyang gipuy-an. Aduna untay dash cam ang
multicab sa biktima apan wa mag-function.
Panawagan sa kapulisan sa mga kabanay ni Antonio dinhi sa Sugbo, kon duna man gani, sa pakig-alayon kanila aron makatabang sa ilang imbestigasyon.
Ang kabanay ni Antonio tua sa Cagayan De Oro hinungdan nga limitado ang nakuhang
background sa kapulisan. Wala pa usab sila masayod sa trabaho sa biktima human niundang isip seaman duha ka tuig na milabay.
Nagpadala na hinuon og intensyon ang igsuon ni Antonio nga atua sa Mindanao sa pagkuha sa mga bata.
Usa ka pastor sa Brgy. Babag ang nakig-alayon sa kapulisan sa kahimtang sa mga bata sanglit higala kini sa igsuon ni Antonio. Usa ka slug ug usa ka empty
shell sa kalibre .45 nga pistola ang nakuha sa kapulisan gikan sa crime scene.
SALVAGE NA SAB
Usa ka lalake nga nabulit sa samad pinusilan napalgang patay sa Sitio Capasanan, Brgy. Casili, Dakbayan sa Mandaue niadtong Miyerkules sa gabii.
Gihulagway sa kapulisan nga ang biktima nagsul-ob og kawo, yellow nga t-shirt ug karsones. Gibana-bana kini nga 30 ngadto sa 35 anyos ang pangidaron.
Nakuha gikan sa crime scene ang unom ka mga kabhang sa .45 kalibre nga pistola.
Alang kang Mandaue City Police Office (MCPO) Deputy Director for Operations Ryan Devaras, posibleng igo lang gidala ang lawas sa biktima sa dapit.
“Daghan naman gyud ang gilabay diha dapita. We believe nga wala na siya diha gipatay. Igo ra na gidala diha sa dapit. Kon naa may mga nakitang bala, pwede baya butang-butangan lang aron ma misled ang pulis,” matod ni Devaras.
Tungod sa kamingaw ug kangitngit sa lugar, matod sa kapulisan, nahimong labayanan na kini sa mga lawas. Iyang gibangyo ang hepe sa police station diin ubos sa area
of jurisdiction ang Casili nga mohangyo sa barangay nga pasug-an ang dapit aron malikayan nga mas daghan pang ilabay nga lawas sa dapit.
Sa pagsuwat ning taho, blanko pa ang kapulisan sa
identity sa biktima. /