Bisaya pa more!
Human sa kadaugan sa Bol-anon nga si Yamyam sa Pinoy Big Brother Otso, laing Bisaya (Sugbuanon gyud) ang nakalangkat og dungog, si Jin Macapagal, isip Ultimate Bidaman sa It’s Showtime. Gamay ra ang porsento sa text
votes ning banggaa. Mas dakong bahin ang grado gikan sa mga hurado.
Sa unang adlaw sa semi-finals, natandog ko sa asoy sa kaagi sa mga nangapil nga nakahilak gyud. Hasta si direk Bobit Vidanes, isip pagdasig sa mga kandidato, nakahilak usab sa iyang pagsaysay sa iyang kaagi
isip usa usab ka dreamer.
Sa semi-finalists, si Eris ug Jin ang akong paborito. Si Eris kay may pagka gwatsinanggo pero sinsero. Tuod man naapil sila sa top three.
Mao nga di ta angay maluya dayon kon makasugat kitag mga kalisdanan sa pagbugtaw nato sa atong mga damgo. Sa mga pagya pa: Go lang ng go! Laban lang!
Sa usa ka pasundayag sa nobenaryo ni Senyor San Roque sa Poblacion, Oslob, nakadayeg ko sa abilidad sa pagtugtog sa mga instrumento ug sa pag-awit sa grupo nga Kamosilla.
Pulos mga batan-on nga bag-o lang napundok pero nakigtigi sa mga may kasinatian sa musika: Jay Francis Legaspi, rhythm guitar; Jake Novo, bass guitar; Wyrlo Ronulo, lead guitar; Jack Daniel Romas, drums; Sean Roncale, keyboard; ug Louie Brylle Prondoso, vocals.
Padayon lang gyud sa pagkab-ot sa inyong mga pangandoy! Mga panghinaut sa malampuson, makahuloganon ug malinawon nga pista, Senyor San Roque.
Di pa kaha andam ang mga makisine karon sa pelikula nga bahin sa sayaw o unsa kaha ang hinungdan? Di kuno kaayo dako ang kita sa Indak nila ni Nadine Lustre ug Sam Concepcion kon itandi sa Hello, Love, Goodbye ni Kathryn Bernardo ug Alden Richards.
Subo nga palandungon kon tinuod man ugaling.