Never change

Hugot ang among pagkuptanay sa kamot ni Reenan samtang naglakaw-lakaw mi sa puting baybayon sa among private beach resort sa lungsoid sa Sogod. Every now and then magpahiyomay mi. Molubyok ang dimples sa walang aping ni Reenan nga makapasamot sa iyang kaguwapo. Kon hitsura ang hisgotan, di mabentahaan si Reenan. Hapit tanang hiyas sa mga lalaki nga gipangita sa babaye naa niya.

Only son si Reenan sa datong mga ginikanan sa siyudad. Siya ang kamanghoran sa tulo ka magsuon. Ang iyang mga maguwang pulos na nakahuman

sa college ug dunay maayong trabaho sa Germany. Apan bisan pa aning tanan, nagpabiling humble si Reenan, di hambugero. Ug labaw sa tanan di spoiled.

“’Never change. Mao ni ang atong motto. Di ba, Rona?”

Mihunong kog lakaw. Gikuha kog hinay ang akong kamot nga gikuptan ni Reenan. Miyaka ko sa balas.

“Sa sinugdanan nagtuo ko nga mao na gyud kana, Reen. But now, di man diay. Batan-on pa man gud ta kaayo sa mao natong sinaaray. Karon nga nia na ta sa hustong edad, may kausaban.”

Miginhawa kog lawom. Naluoy ko kang Reenan. Gipalaom nako siya.

“I understand, Rona. But who knows, mausab pa nang naa sa imong hunahuna.”

“Lagmit mahitabo na. Pero ang pinitik sa kasingkasing?”

Miginhawag kusog si Reenan. Mipasiplat ko niya. Nakita ko ang gibating kaguol sa iyang nawong. Naglantaw siya sa lawod.

Gikuptan ko sa bukton Reenan.

“I’m very sorry, Reenan.” “Is this goodbye, Rona?” Naglisod kog tubag. Di ko gusto nga pun-an pa ang gibating frustrations ni Reenan. Kon mahimo ko pa lang pugngan ang pinitik sa akong kasingkasing, gibuhat ko na. si

“Wa sa akong hunahuna nga pasakitan ka, Reenan. Miabot lang gyud sa punto nga gusto na kong molingkawas nimo.”

Almost two years ang among relasyon ni Reenan. Wa gyud ko magdahom nga mausab ang pagbati ko niya. Third college mi ron. Ug nahinumdom ko kang Carlo. Siya ang dakong rason nga nausab ang pagbati ko kang Reenan.

“Di parehas ka kaguwapo si Carlo kang Reenan apan nabatyagan ko kaayo nga mas gimahal ko siya kay sa akong boyfriend. Usa ka hitabo sa akong kinabuhi nga maoy nahimong hinungdan sa among panaghimamat ni Carlo.