UC HARI SA INAYAWAN
Nakaipsot ang University of Cebu (UC) Webmasters sa dakong pagpanghudlat sa University of Southern Philippines Foundation (USPF) Panthers sa himatyon nga segundos, 94-93, aron langkaton ang kampiyonato sa 2019 1st Captain Kirk Bryan Repollo/St. Agustine Cup Inter-collegiate basketball tournament nga natapos niadtong Miyerkules sa gabii sa Barangay Inayawan Sports Complex, dakbayan sa Sugbo.
Nag-ungaw ang Webmasters sa posibling pagkapukan sa dihang nakuha ang bola sa Panthers sa himatyong mga segundos nga naghatag kanila og kahigayonan nga mabali ang resulta.
Apan sa unsang pagkaunsaa nga ang reverse layup sa Panthers nga natukma usab sa pagkapupos sa oras igo ra mang misaylo sa ring nga maoy nakapahugyaw sa mga dumadapig sa matag habig sulod sa complex.
Kulba ug kahinam ang nasaksihan sa mga basketball fans sanglit nagpulipuli man og sakmit sa labaw ang duha ka kuponan sulod sa upat ka mga kwarters.
Si Shane Menina, kinsa mipabaha og 26 puntos alang sa UC, maoy napiling most valuable player sa torneyo nga gidalit isip usa sa mga kalihukan sa kapistahan sa maong barangay.
Ang mga batos ni coach Raul “Yayoy” Alcoseba, gawas sa championship trophy, mibulsa usab sa P30,000 nga ganting salapi samtang P20,000 usab ang naangkon sa Panthers.
Sa inter-sitio seniors division, ang Porok 5 Sityo Plas mipildi sa Porok 6 Sitio Sea Lions, 102-82.
`Mga puntos:
UC (94) - Menina 26, Sesay 24, Garvira 16, Albina 9, Gabisan 8, Pacana 6, Urdaniza 5.
USP-F (93) - Swint 26, Chavez 14, Mendez 12, Estardo 11, Cauba 8, Langahin 8, Garong 4, Ursal 4, Sarahina 3, Maglasang 3.