KABIT, BANA NAABTANG NAG-SEX

MISIS, PULIS NAKAAKTO KAY 2 WA MANG-LOCK SA PULTAHAN

Naabtan sa asawa ug kapulisan ang iyang bana nga traysikol driver ug giingong kabit samtang nag-sex sulod sa usa ka lawak sa resort sa lungsod sa Compostela.

Ang duha naaktuhan nga nag-sex mga alas 2 sa hapon, Sabado, Agusto 17, kay wa mang-lock sa pultahan.

Matod ni Police Captain Ian Macatangay, hepe sa Compostela Police Station, nga alas 11 sa buntag, nireklamo sa ilang buhatan ang asawa nga usa ka overseas Filipino worker (OFW) sa iyang bana nga alyas Benjie, taga lungsod sa Liloan.

NGANONG NASAKPAN

Matod sa asawa, kinsa tulo pa ka buwan sukad nahiuli gikan sa abroad, nga iyang nabasahan ang text message sa kabit sa iyang bana nga magkita sila sa usa ka beach resort.

“Tulo pa ni ka buwan nga nakauli sa ilaha ning asawa. Gaduda man ni siya kay nakadungog siyag estorya sa silingan nga kining iyang bana naay permi kakita nga lain daw. Sayo sa buntag ganina (Sabado), nabasahan niya sa text sa iyang bana, naay text sa babaye, nga magkita sila nga mangadto sa beach resort,” matod ni Macatangay.

Kanunay na mag-away ang bana ug asawa tungod sa mga nadawat nga kasayuran nga adunay lain nga gikabuangan si alyas Benjie samtang toa siya nanarbaho sa gawas sa nasud.

Apan hugot sa iyang panghimakak ang bana nga siya nagbinuang sa ilang kaminyuon.

Human mahatag ang tanang impormasyon sa asawa ngadto sa kapulisan, ila dayon nga giadto ang lugar mga alas 2 sa hapon.

Tuod man sa pag-abli sa pultahan sa kwarto sa G & M sa sitio Lutao, Barangay Estaca, lungsod sa Compostela, ila pang naabtan ang duha nga mga hubo na ang mga lawas ug naa sa akto nga nag-sex.

GIDUMOG

Ang asawa nga nakakita sa gibuhat sa duha, wala ma pugngi sa mga pulis, niduol sa iyang bana ug kabit ug dayong labnot sa buhok sa babaying barangay tanod ug sa iyang bana.

Wa na makapamakak pa si alyas Benjie kay plastada ang ilang gibuhat nga nasaksihan mismo sa mga pulis.

Ang babaying barangay tanod usa usab ka minyo ug adunay mga anak sa lungsod sa Liloan.

“Pag-abli sa pultahan, caught in the act gyud nga nagpatung ang babaye sa lalake. Mao to, gipangdakop nato ang duha. Filan nato silag kasong concubinage ug Anti-Violence Against Women and Their Children Act of 2004 ang bana,” pasabot ni Macatangay.

Kasamtangan nga gipangbalhog ang duha sa selda sa Compostela Police Station. Sa Lunes, Agusto 19, ipasaka sa kapulisan ang mga kaso. /