Never change

Ambot ba sab, uy, nga sa sige nakong huwat nga mangulitawo si Carlo nako apan wa man gyud kini mahitabo. Na, morag naglaom ko sa wala. Apan nagtuo ko nga naghuwat lag hustong higayon si Carlo aron daygan ko niya sa iyang gugma.

Kanunay siyang mamisita nako. Karong gabhiona gani nia na sab siya. Malipayon kong nakig-atubang niya sa among sala.

“Komusta na ang imong study, Ron?”

Hilom kong nakapanghupaw. Mao gyud kini ang kanunay niyang isulti nako. Wa gyud siya maghisgot kon unsa ang iyang

feeling nako. Mao bitaw nga usahay makahunahuna ko nga di unta nako angay gibuwagan dayon si Reenan.

Naluoy baya ko kang Reenan. Wa siyay nahimong sala nako unya giyanu-yano ko lang ang pagpakigbuwag niya. Apan unsaon ta man, nabalhin man ang akong paghigugma ngadto kang Carlo. Safe ko kang Carlo kon dunay magbinuang nako kay black belter diay siya sa karate. Apan mao lagi, wa pa gyud ko pangulitawhi ni Carlo.

“Okey man, Carl. Ikaw, wa ba maproblema sa imong pageskuwela?”

“Wa man, Ron. As usual dagko gihapon kog grades.”

Unya kalit nga nasubo ang nawong ni Carlo. Nahibulong ko. “May problema ba, Carl?” Wa dayon motubag si Carlo. Naghinuktok siya. Nagtuo gyud ko nga dunay nakahasol niya. Unya kalit kong nalipay sa hilom. Tingali maoy nakahasol niya kon unsaon ko niya sa pagpangulitawo, kon unsaon niya sa pagpadayag ang iyang gugma nako. Dunay kalit nga misantop sa akong hunahuna.

“You know, Carl, di ka lisod mahalon. Pero depende ra sab kon pangulitawhan mo ang girl nga imong love.”

Gipanid-an ko ang reaksiyon ni Carlo. Ako na ang nagpasumbingay niya. Siyaro kon di gihapon siya makahimo sa pagpadayag sa iyang feeling nako.

“Mao sab nay sulti sa mga babaye nga akong friend, Ron.”

Daghan gyud diay ang nakagusto kang Carlo, nakaingon ko sa hilom.

“May uyab ka na, Carl?” Morag gusto na gyud nako nga motug-an si Carlo sa iyang love nako. Na, sugton dayon nako siya. Unsa pa man say dugayan?

“Wa pa gyud ko makasuway og uyab, Rona. Aw, duna man koy naibgan ba.”

Na, ako na gyud ang babaye nga giingon ni Carlo. Nalipay kaayo ko sa hilom.