LONG LIFE ALANG KANG MAMA PACING

Sukad sa iyang pagkabatan-on hangtod karon, way hunong sa pag-atiman sa iyang baol si Esperanza “Mama Pacing” Higida sa lungsod sa Argao, habagatang Sugbo.

Alas 4:00 pa lang sa kaadlawon, nagmata na si Mama Pacing ug nangandam alang sa iyang pagpanguma. Siya nagpanuigon na og 87. Ug bisan kon gitambagan na siya sa iyang mga anak nga moundang na, padayon siya nga nagtikad sa iyang baol kay kini maoy iyang kalipay.

Niadtong Hulyo 27, 2019, Sabado, gisaulog ang ika-87 nga kasumaran sa adlaw nga natawhan ni Mama Pacing. Apan ang iyang tinuoray nga birthday kay matag petsa 30 sa Hulyo.

Sigon ni Diane Higida-Patricio, usa sa mga apo ni Pacing, gisaulog og sayo ang birthday sa iyang apohan nga babaye aron makatambong ang tanang mga anak ug mga apo sanglit naatol nga Martes o tingtrabaho ug tingklase ang Hulyo 30.

Unsay sekreto sa taas nga kinabuhi ni Mama Pacing?

Si Patricio nitubag ang pagkaon og mga utanon ug ang kanunay nga pag-atiman sa iyang umahan maoy naghatag og kabaskog sa iyang lola.

Bayente ka tuig ang nakalabay dihang namatay ang kapikas ni Mama Pacing nga si Alejandro Higida tungod sa lung cancer.

Nagbunga og unom ka mga anak ang ilang gugma.

Espesyal ang kasaulogan sa labing uwahi nga birthday ni Esperanza kay nanguli ang iyang mga anak nga tua na nagbase sa abroad, sila si Lydia Higida-White ug Mary Higida. Si Lydia nagtrabaho isip nursing assistant sa California, U.S.A. samtang domestic helper si Mary sa Hong Kong. Kumpleto ang magsuon sa

birthday party sa ilang inahan nga gipahigayon sa Kalumpang Beach Resort sa lungsod sa Argao, habagatang Sugbo. Kini naglakip nila ni Catalino, 64; Elsa, 63; Precy, 59; Lydia, 53; Mary, 51. Ang party gisugdan og dedication prayer dayon ang thanksgiving. May nipaambit sa ilang talento sa sayaw ug kanta. Sa ilang mga mensahe ug

wishes sa adlaw nga natawhan sa ilang inahan, ang magsuon pulos mapasalamaton sa kahigayonan nga sila nagkatapok ug sa dugang kinabuhi sa inahan.

Sila nanghinaut nga hatagan og taas nga kinabuhi ang ilang pinangga nga inahan.

■ ABTIK PA: Mihiwa sa iyang cake si Esperanza "Mama Pacing" Higida atol sa kasaulogan sa iyang adlaw nga natawhan nga gisaulog og sayo niadtong Hulyo 27, 2019. Mitambong usab sa party ang iyang mga higala nga sama niya mga mag-uuma sa lungsod sa Argao. / TAMPO