USC-NABC SUGDAN
Pormal nga sugdan karong hapon ang University of San Carlos-North Alumni Basketball Club (NABC) Cebu City Mayor’s Cup diha sa USC North Campus, General Maxilum Avenue, dakbayan sa Sugbo.
Atol sa press conference niadtong Sabado sa First 5 Sports Lounge and Cafe, gibutyag sa mga nagpasiugda nga gipangulohan nila ni Ryan Villaflores, president sa USC North Alumni Association, nga karong tuiga, gawas sa Division I, II ug III, aduna na usay seniors division nga langkuban niadtong 45-anyos ug pataas.
Moabot ngadto sa 30 ka mga teams nga gikan sa nagkalainlaing batches ang misalmot ning tuiga - walo sa Division I, walo sa Division II, pito sa Division III, ug pito sa Seniors Division.
“Hopefully with the additional of Seniors Division, daghan na unya ang moapil og balik. Kay somebody told us man gud nga dili advisable nga i-mixed nato ang edad-edaran na ngadto sa mga batan-on. Morag risky na ba sa health,” matod ni Ernest Evangelista, ang pangulo sa USC-NABC.
Motambong sa opening ceremony nga sugdan sa alas tres sa hapon si Cebu City Mayor Edgar Labella, kanhi PBA star konsehal Dondon Hontivers ug ang commissioner sa Philippine Sports Commission (PSC) nga si Ramon “El Presidente” Fernandez.
Ang tradisyonal nga parada sa tanang partisipanting teams uban sa ilang tagsatasa ka mga musa ang moabli sa opening ceremony diin ideklarar usab ang best muse, best in uniform ug ingon man ang biggest delegation.
Sa niaging tuig, ang Batch 1985 nga gibituonan ni Lou Regidor maoy kampiyon sa Division I, samtang ang Batch 1999 nila ni Christopher Osorio mao usab ang midominar sa Division II.
Ang Division III gipatugbabawan sa Batch 2011 nga gipangulohan nila ni Dave Guardiario.
Si Jax Bautista, ang commissioner, mibutyag nga ang mga duwa ipahigayon matag adlawng Biyernes, Sabado ug Dominggo.