GRANDSLAM GITINGUHA SA BEERMEN
Human naangkon sa San Miguel Beermen ang titulo sa Philippine Basketball Association (PBA) 2019 Commissioner’s Cup, nagsugod dihadiha dayon ang paghisgot kabahin sa ambisyon nilang makalangkat na sab sa talagsaong Grandslam title.
“Wala nang pupuntahan kami kung hindi doon,” matod ni San Miguel coach Leo Austria nga napatik sa Spin.ph.
Ang Beermen ningpukan sa Talk N’ Text KaTropa, 102-90, sa Game 6 nga maoy nahuman og sayo sa Commissioner’s Cup finals best-of-seven series, 4-2, niadtong Biyernes sa Araneta Coliseum.
“We’re targeting another championship. Double purpose ito dahil once makuha namin yung championship sa third conference, siguro mababalato na sa amin yung grand slam,” dugang ni Austria.
Sa miaging duha ka mga tuig, ang Beermen nahimutang na niining sitwasyuna diin nagkinahanglan na lang nilang maangkon ang Governor’s Cup title aron makompleto ang Grandslam.
Apan niadtong higayuna, gipakyas sila sa Brgy. Ginebra Gin Kings sa Governor’s Cup finals series.
Ang Beermen katapusang nakalangkat og Grandslam niadtong 1989 diin gipangulohan pa ang team nila ni Ramon Fernandez, Hector Calma ug Samboy Lim.
Sa 43 ka mga tuig nga kasaysayan sa PBA, lima pa lang ka Grandslam ang nabira, duha sa Crispa Redmanizers ug tagsa sa San Miguel, Alaska Aces ug San Mig Coffee Mixers.
Sa kalawom sa puwersa sa Beermen diin pulos aduna sila’y lig-ong mga haligi sa tanang posisyon, dili layo ang posibilidad nga ilang maangkon ang ikaduha nilang Grandslam title.
“It would really be an honor kung makukuha namin ito because they are really longing for this grand slam,” pasabot ni Austria.
Hinuon, gitataw ni Austria nga dili kini sayon nga tahas gumikan kay daghan ang ligong teams nga adunay kapabilidad sa pagsanta kanila.
“A lot of teams are really competitive. And we’re always the target of these teams in the PBA,” matod ni Austria.
Alang kang Austria, ang bugtong yawe nga makakompleto na sab sila og laing Grandslam mao ang pagkuha og dekalidad nga import alang sa umaabot nga Governor’s Cup.
“Ang import ay malaking role ang ginagampanan niya dito sa ligang ito. Kaya we should look for somebody who could play along with our team,” asoy ni Austria.
Adunay hugonhugon nga ang napilian nga import sa Beermen alang sa Governor’s Cup mao si Dez Wells, usa ka 6’5’ forward sa Maryland diin napiling kini sa First Team All-Big Ten.
Nagduwa sab si Wells sa Oklahoma City Blue sa National Basketball Association (NBA) D-League una kini mipakita og aksyon sa Greece ug Italy. /