Malipayon ug subo nga mga panghitabo
Nagbangutan karon ang kalibutan sa syobis labina ang Kapamilya Network tungod sa pagpanaw ni Gina Lopez. Daghan ang iyang natabangan tungod sa mga kalihukan nga iyang gipasiugdahan.
Usa niini mao ang Quest for Love nga nakahatag kaayohan sa mga taga Kinatarcan, Bantayan. Sa presscon ning maong proyekto nako nahimamat si Ma’am Gina.
Pahulay sa kalinaw, Madam!
Dinhi sa Cebu, gawas sa pamilya, nagbangutan usab ang mga tawo nga nakatrabaho nila ni kanhi Bokal ug Konsehal Julian ‘Teban Escudero’ Daan ug sa magbabalak, magsusulat, kolumnista ug consultant ning atong mantalaan, Ernie Lariosa.
Padayon sa inyong panaw, Sirs Teban ug Ernie!
Karon nang Dominggo, Agosto 25, ang pagbanhaw sa usa sa daghang proyekto ni Gob. Gwen Garcia kabahin sa kultura, ang Pasigarbo sa Sugbo. Dunay streetdancing padulong sa Cebu City Sports Center diin adto himoon ang ritual showdown.
Kwarenta kapin ka mga local government units ang moapil. Mosaksi ta aron mabati nato ang garbo isip Sugbuanon.
Mga pahalipay sa mga mananaug sa bag-o lang gipahigayon nga Sadsad Festival sa Brgy. Poblacion, Oslob: Purok Kawayan, kampiyon, best in streetdancing, choreography ug andas; Purok Tugas ug Purok Acacia, ikaduha ug ikatulong ganti.
Mga pahalipay usab kang Devika Raian
L. Abines nga nakoronahan isip Sadsad Festival
Queen 2019. “Mag-Sadsad tang tanan”… sa sunod tuig!
Morag may purohan gyud nga mosulod sa kalibutan sa politika si Kris Aquino. Duna siyay paduding mahitungod niini sa seremonyas sa paghandom sa kamatayon sa iyang amahan, si Sen. Benigno ‘Ninoy’ Aquino Jr.
Dinhi namatikdan nga wa makatambong si kanhi Presidente Noynoy Aquino kay may sakit kuno. Get well soon, ex-President Noynoy! Feeling close? Hehe!