MCWD board gipanangtang

Sa dihang akong gisuwat sa akong lindog sa Sun Star Cebu niadtong Agusto 20 kabahin sa umaabot nga protesta batok sa mga sakop sa board of directors sa Metropolitan Cebu Water District (MCWD), igo lang kong gikataw-an ni Joel Mari Yu, ang chairman of the board sa MCWD. Gitawag pa ko mga intrigero. Misegunda usab si kanhi Cebu City councilor Augustus Pe nga usa sa mga board.

Ang MCWD Board gilangkuban nila ni Yu isip chairman, Jun Pe, kanhi konsihal Coping Fernandez, kanhi city attorney Ralph Sevilla ug Atty. Cecilia Adlawan. Gawas ni Fernandez, nga tinudlo ni kanhi mayor Mike Rama, ang upat pulos tinudlo ni kanhi mayor Tomas Osmena. Ang unang plano mao unta nga ang mga empliyado labi pa ang mga sakop sa labor union sa MCWD ang molusad og protesta. Apan nausab kini kay ang mga pulitiko naman ang mikastigo sa MCWD officials gikan sa nagkalain-laing local government units dinhi sa Metro Cebu nga ubos sa franchise service areas sa MCWD apil ang Kapitolyo. Ang mga nagkalain-laing konsiho mipasar og mga resolutions nga nag-kondinar sa palpak nga serbisyo sa panubig sa MCWD. Bisan pa man sa panawagan nga moluwat ang mga sakop sa board labi pa ang mga tinudlo ni Tomas apan nagpa-ugat pa yud sila labi pa si Yu nga hambog lang ang kadaghan. Nagtuo siguro sila nga dili sila matangtang kay adunay silay term of office.

Apan niadtong miaging adlaw, mipagawas og kamanduan si Mayor Edgardo Labella nga nag-terminate sa serbisyo sa mga sakop sa board. Ang termination paper adunay gipasukip nga suwat usab gikan ni Jeci Lapus, administrator sa Local Water Utilities Administration (LWUA) nga nagsuporta sa aksiyon sa mayor. Kini pinasikad sa Section 11 Presidential Decree 198 nga diin nagkanayon nga “ang mayor adunay gahum sa pagtangtang sa mga sakop sa board kon adunay igong rason.” Ang rason sa mayor kay wala makahatag og saktong solusyon ang board niining krisis sa supply sa panubig. Well, nunot ning pagtangtang kanila, masulbad kaha ang problema sa supply sa tubig? Abangan.