Love at first sight
Gipakita ko kang Ace nga nalipay ko sa nakita ko ron niya. Nag-atbang mig lingkod sa sala. “You know, Ace, sa akong nakita nimo ron, sure na gyud ko nga naka-move on ka na.”
Mikidhat pa si Ace nako. Nakita ko ang dako niyang kausaban. Wa na nako makita sa iyang hitsura ang gibating kaguol. Sayag na ang iyang nawong. Ug morag mikalit lang ka kapresko ang kolor sa iyang nawong.
“Nahunahuna nako, Jenevie, nga wa nay kapuslanan kon maghunahuna pa ko sa akong ex-girlfriend. Angay na kong mag-move on ug kalimtan siya.”
“Wow! Nindot paminawon nang imong giingon, Ace. Naa si Susan, angayan mong pareson. Di imposible nga na-love at first sight ka niya. Mao sab nay gibati ni Susan diha nimo, Ace.”
“Di pa ko makaingon nga mibati kog ingon ana, Jen. Sa pagka karon, wa koy laing nabatyagan kang Susan, friend lang gyud.” “Nakigpangaon ka man lagi niya?”
“Well, gusto kong magkasuod gyud mi. Gusto kong mahibaw-an kon unsa gyud ang tinuod kong gibati niya.”
Miyangu-yango ko. “Well, husto ka sab ana, Ace. Angay gyud nga makigsuod ka niya aron sa ngadto-ngadto ma-develop ang imong pagbati niya.”
“Di man ko motuo anang giingon nga ma-develop, Jen. Kon wa gyud kay gusto sa usa ka binuhat, bisag kada adlaw pa mo magkuyog, di gyud ka mahigugma niya. Kanang love at first sight, motuo ko ana. Daghan na kini mahitabo sa usa ka tawo.”
Nahilom ko. Sa akong paniid morag wa gyuy love si Ace kang Susan.
“Ikaw, Jen, nakasuway na ba anang love at first sight?”
“H-Ha?” Puwerte nakong kuganga. “Kining, nakasuway na man. Pero ambot kon love ba sab ko niya.” “Aw, kon kamo, kamo gyud, Jen.”
Bisan unsa na lang ang among giestoryahan ni Ace. Gikan sa love, napunta ang among topic sa among pagstudy. Hangtod nga mipauli na siya. Na, naunsa ba ko, uy, wa na man sab ko makatulog dayon? Naglisu-liso ko sa akong higdaanan. Mobangon ko ug unya mohigda na sab.
Way laing nasulod sa akong ulo, si Ace ra gyud.
Morag di ko na gyud ikatago sa akong kaugalingon nga sa unang higayon pa lang nga nakita ko si Ace, hilom na kong dunay pagbati niya.
(SUMPAYAN)