Kanhi sportswriter moapil sa Cepca Tatluhan

Makigpinug-anay og singot sa utok ang kanhi sportswriter sa SunStar Cebu nga si Jaime Frias II sa Cebu Executives and Professionals Chess Association (Cepca)-organized 3rd Boy “Chessmoso” Pestaño Memorial Chess Cup Tatluhan Rapid Tournament nga gikatakda karong Oktubre 19-20 sa Barracks Chess Club sa Robinsons Galleria Cebu.

Si Frias maoy mangulo sa team gikan sa Cagayan de Oro City, nga nagtinguhang masaka ang ilang 3rd place finish sa miaging tuig.

Kauban ni Frias, 36, mao sila si Cleto Vasquez ug Edward Tare.

Sama sa ubang mga partisipante, ang Cagayan de Oro squad mosuway paglabni sa kampiyunato apan gitataw ni Frias nga mas labaw ang aspeto sa lingaw-lingaw sa ilang pagsalmot sa kompetisyon.

Mas taas ang moral ni Frias ning higayuna gumikan kay gikan siya sa kalampusan sa duha ka sunodsunod nga international events nga iyang gisalmutan.

Naghari siya sa Australian Open nga giulohan og ‘2019 02C Doeberl Cup Major Chess Tournament’ niadtong Abril 19-22 ug 26th Abu Dhabi International Chess Festival open division niadtong Agusto 10 sa Abu Dhabi, United Arab Emirates.

Ang Cagayan de Oro usa lang sa mga lugar sa gawas sa Sugbo adunay lig-ong puwersa nga mangasdang sa kompetisyon, nga gipahinungod ni anhing Boy Pestaño, usa ka founding fathers sa Cepca ug kanhi chess columnist sa Sun. Star Cebu.

Ang ubang mga lugar nga mopadala og puwersa sa torneyo mao ang Sagay City Chess Club sa Negros Occidental, ug Tagbilaran City, Bohol.

Ang labing inilog sa torneyo mao ang Cepca Team A, nga maoy defending champion.

Naglangkon sa Cepca Team A mao sila si Venancio Loyola, National Master Arnolito Cadiz ug Carlo Maraat.

Ang torneyo, nga gisuportahan sa Jemar Engineering Services, Celjem Construction and Development Corporation, Handuraw Pizza, ug Salon de Rose, magdalit og dul-an sa P100,000 isip kinatibuk-ang ganti.

Ang kampiyon makadala og P50,000, makabulsa og P20,000 ang 2nd placer, P10,000 sa 3rd placer, P7,000 sa 4th placer ug P5,000 sa 5th placer. Ang makasulod sa top 12 adunay P2,000 nga ganti matag usa.

Alang sa ubang mga impormasyon, mahimong motawag nila ni Engr. John Velarde (0933-1096622/09176666717), Jerel Velarde (09950338922), Ruel Hortelano (0942-2722354), Marvin Ruelan (0932-7152411) o Jun Olis (0942-4641565).

/ ERWIN S. LIRAZAN ■ CHESS: Nagpahulagway ang mga sakop sa CEPCA nga gipangulohan sa ilang presidente nga si Engr. Jerry Maratas (3rd, L-R) human sa ilang panaghugpong kabahin sa pagpahigayon sa ilang gi-organisar nga 3rd Boy ‘Chessmoso’ Pestaño Memorial Chess Cup Tatluhan Rapid Tournament.