MCWD naligo sa kontrobersiya

Pastilan, nagnihit na ang tubig sa dakbayan sa Sugbo ug kasilinganang (LGUs) gikan sa Metropolitan Cebu Water District (MCWD). Gisamotan pa kini sa pagkaligo sa kontrobersiya human di mokanaug sa pwesto ang lima ka Board of Directors (BODs) sa water facility nga giisyuhan og notice of termination ni Cebu City Mayor Edgardo Labella.

Hinuon, katungod usab sa 5 ka BODs nga mokuwestiyon sa mando sa mayor taliwala sa mga alegasyon batok kanila nga dunay tino nga termino sa posisyon.

Si MCWD Board chairman Joel Mari Yu, nilagda sa hiniusang suwat-tubag ni Labella, penitsahan og Oktbre 17, 2019, Huwebes nagkanayon nga “ilegal ug inbalido” ang mando.

Gawas ni Yu, ang board members Augustus “Jun” Pe Jr, Procopio “Coping” Fernandez, Atty. Ralph Sevilla ug board secretary Cecilia Jugao-Adlawan nga di usab motuman sa notices of termination gikan ni Labella.

Apan gipahimug-atan sa Cebu City Legal Office, gipangulohan ni Atty. Rey Gealon, nga nasubay sa balaod ang pagtangtang ni Labella sa 5 ka BODs sa MCWD.

Si Gealon nagkanayon nga pinasubay sa balaod ang gihimo ni Labella labi na sa Presidential Decree 198. Giaprobahan kini sa Local Water Utilities Administration.

Si Labella nibutyag nga adunay jurisprudence didto sa Camarines nga dunay sitwasyong sama sa MCWD diin gitangtang ang ilang BODs.

Parehong dunay gibarogang punto ang duha ka mga habig ug seguradong sa korte kini matigi. Ug ning maong kalamboan, taudtaod pa masulbad ang maong kontrobersiya.

Ang katawhan padayong maapiki sa tubig. Busa, manawagan kita kang Presidene Duterte nga mopatunga sa krisis sa tubig sa Sugbo ug kontrobersiya sa tagdumala sa pasilidad.