Love at first sight
Hingpit ko nang nakita ang dakong kausaban ni Ace. Malipayon na gyud kaayo siya. kanunay siyang magpamisitahan nako ug naghuwat ko nga iyang pangulitawhan. Aw, ambot lang kaha kon mahitabo ba kini?
Wa ko makahibawo kon nahigugma ba sab siya nako. Basig na-in-love na siya ni Susan.
Usa ka gabii sa Sabado, mitawag si Ace nako. Diha na ko sa akong kuwarto, naghigda apan wa pa ko matulog. Nagkalingaw kog paminaw og sounds sa akong laptop.
“Hello, Jen. Gd eve.”
“Maayong gabii sab, Ace. Nanawag ka man?”
Na, morag misugwak sa akong kasingkasing ang gibati kong kalipay. Morag gikulbaan ko kay ambot ba, nga sa matag estorya namo ni Ace naglaom man gyud ko nga mopadayag na siya sa iyang gugma nako.
“Kining, Jen, di man ko kaagwanta.”
“Unsay di ka na makaagwanta, Ace?”
Mikatawa ko kay nahimuot ko sa akong nadungog.
“Kuan ba. Kaniadtong nagkaila ta, na-love at first sight ko nimo pero mas gipalabi ko ang akong love sa akong ex-girlfriend.”
Nagnganga ang akong baba apan way bisan usa ka pulong nga migawas. Miabot na gyud ang akong gihuwat. Gipangulitawhan na gyud ko ni Ace. Ug parehas sab diay mi, na-love at first sight mi sa usag usa.
“Tinuod na, Jenevie. Nahigugma ko nimo sa una pa lang natong panagkita.” “Kuan, Ace, kanang…” Wa ko makatiwas sa gusto kong isulti kay grabe na gyud ang kalipay nga akong gibati. “Love ba sab ko nimo, Jen?” Unsa pay akong itubag? Sundon ko gyud ang pinitik sa akong kasingkasing?
“Oo, Ace. Love sab tika. Nalove at first sight sab ko nimo.”
Sa misunod nga mga adlaw, sweet na kaayo mi si Ace. Wa gyud ko masayop nga siya ang akong gimahal. Buotan siya ug caring nako. Usahay hisgotan ko niya ang iyang ex-girlfriend apan mo-smile na lang siya nako.
“Wa na siya sa akong kasingkasing, Jen. Naka-move on na gyud ko. Gidawat ko na sa hingpit nga di mi para sa usag usa.”
Mao kini ang kanunay isulti ni Ace nako kon mahisgotan ko niya ang kanhi niyang trato. Ug si Susan, nahibaw-an nako nga duna nay boyfriend. Naglaom ko nga kami na gyud si Ace forever.
(KATAPUSAN)