CESAFI PLAYERS GIPASIDAN-AN

Human sa sunodsunod nga ejections ug suspensions nga napahamtang sa ubayubay nga mga magduduwa sa Cebu Cebu Schools Athletic Foundation Inc. (CESAFI) basketball college division, si commissioner Felix Tiukinhoy Jr. mipahimangno sa tanang mga

atleta nga dili magpadala sa kainit sa emosyon.

Sa usa ka memo nga gipadala sa tanang partisipanteng mga tunghaan, si Tiukinhoy misugyot sa athletic directors nga pahinumdoman ang ilang mga atleta nga ipatigbabaw ang sportsmanship sa kanunay.

“This office, for the nth time, would like to plea to remind all your players to keep their cool during the game and play with the spirit of sportsmanship,” tipik sa memo ni Tiukinhoy.

“Though basketball is a physical game though not to the extent would equate into boxing or brawl that would physically harm against each players. And this reminder is not limited to your players but as well to head coaches and coaching staff.”

Gipadangat ni Tiukinhoy kining maong memo human sa kasamok nga naglambigit nila ni Steven Ursal sa University of Southern Philippines Foundation’s (USPF) Panthers ug Kenneth Brillo sa University of San Carlos’ (USC) Warriors sa miaging semana.

“You are the role model of the public on how the true spirit of sportsmanship and discipline should be. And it would be ridiculous and ironic situation that you yourselves are the ones showing bad example to the public who admire and idolize each one of you as a player, coach or coaching staff,” dugang ni Tiukinhoy.

Gitataw ni Tiukinhoy nga ang magduduwa o coach nga ma-ejected sa ikaduhang higayon pahamtangan na og multa nga P10,000 ug community service nga walo ka mga oras.

Sa laing bahin, mobalik ang aksyon sa Cesafi basketball karong hapon diin magsangka sa premirong duwa ang USC Baby Warriors ug Cebu Institute of Technology University (CITU) Wildkittens sugod sa alas 12:30 sa udto alang sa high school division.

Mosunod niini ang laing kombati sa high school tali sa University of Cebu (UC) Baby Webmasters ug University of Cebu Lapu-Lapu Mandaue (UCLM).

Sa college division, magparang ang USPF Panther batok Southwestern University (SWU) Cobras sa ikatulong duwa samtang magpinaksitay sa main game ang CITU Wildcats batok University of San Jose Recoletos (USJ-R) Jaguars.