CLIPPERS MAOY MAGHARI — GMS
Mokampiyon ang Los Angeles Clippers sa 2019-20 National Basketball Association (NBA) basi sa resulta sa tinuig nga NBA.com GM Survey.
Miabot sa 46 ka mga porsiyento sa general managers sa liga ang miingon nga mopatigbabaw ang Clippers gumikan sa paghiabot ni Kawhi Leonard.
Nagkahiusa sab ang mga GM sa pag-ingon nga ang pagbiya ni Leonard sa champion Toronto Raptors aron motapon sa Clippers mao ang nakahimo og grabeng langas sa offseason.
Ginganlan sab sa mga GM si Leonard isip labing maayong small forward sa liga. Nagsunod sa Clippers isip sayong mga paborito nga maghari sa 2019-20 season mao ang Milwaukee Bucks (36 percent) ug Los Angeles Lakers (11 percent).
Ang kasamtangang MVP nga si Giannis Antetokounmpo sa Bucks maoy nakakuha sa labing daghang mga boto kabahin sa kon kinsa ang mahimong MVP sa umaanot nga season. Nakahakot siya og 52 percent sa mga boto samtang nagtabla sa ikaduhang dapit nga adunay 10 porsiyento matag usa mao sila si Stephen Curry sa Golden State Warriors, Anthony Davis sa Lakers, ug Leonard.
Si Antetokounmpo sab ang nakakuha sa labing daghang mga boto kon kinsa nga magduduwa ang kuhaon sa mga GM kon magpalig-on kini og puwersa (86 percent), best power forward (59 percent) ug best international player (79 percent).
Adunay 68 percent sa mga GM nga nagtuo nga si Zion Williamson sa
New Orleans
Pelicans maoy modaog sa NBA
Rookie of the Year.
Wala pa man tuod nakaduwa si Williamson sa regular season apan 41 porsiyento sa mga GM ang miingon nga siya ang most athletic player sa liga.
Sa laing babin, nagpakatap og 26 puntos ug 14 rebounds si Antetokounmpo aron agakon ang Bucks ngadto sa 11896 nga kadaugan batok sa Minnesota Timberwolves sa NBA pre-season.
Si Khris Middleron nidugang og 18 puntos ug pito ka assists alang sa Bucks samtang nitunol og 14 puntos si Robin Lopez. Ang Bucks mingsaka sa 5-0 nga rekord samtang ang Timberwolves nahagba sa 2-3 nga baraha.
Sa lain pang mga duwa, gipansilaban sa Miami Heat ang Orlando Magic, 107-98, gipangsungag sa Chicago Bulls ang Atlanta Hawks, 111-93, samgtang gipangbuntog sa Denver Nuggets ang Portland TrailBlazers, 110-104.