Religious group magpundok sa Mandaue

Pahimangno sa tanang mga motorista sa posibleng paghuot sa trapiko sa North Reclamation Area karong Sabado, Nobiyembre 30, 2019 diin gibana-banag moabot ngadto sa 400,000 ka mga tawo ang motambong sa matag tuig nga kasaulogan sa Jesus Reigns.

Si Arnold Malig-on, in charge sa Traffic Monitoring sa Traffic Enforcement Agency of Mandaue (Team), niingon nga adunay posibleng paghuot sa trapiko apan, sa duha lang kini ka oras atol sa pagpahigayon sa parada sa Jesus Reigns sa ala 1 sa hapon sa Sabado.

Ang Jesus Reigns tambongan sa nagkalain-laing probinsya sa nasod sa nagkadaiyang mga relihiyon aron sa pagsibya sa ngalan ni Jesus, sigon pa sa tigpamaba sa Jesus Reigns nga si Grace Valdez.

Ipahigayon ang kasaulogan sa kilid sa Bai Hotel atbang sa Parkmall.

Ang rota sa parada gikan sa venue paingon sa Ouano Avenue moliko sa Cabahug st., paingon sa M. Logarta st., dayon sa E.O Perez St. lahos sa F.E. Zuellig Ave paingon sa venue.

Si Florentino Nimor, nangulo sa Team, niingon nga nitugot sila sa pagpa-counterflow sa parade ug pag-okopar sa usa lang ka lane.

Ang nahabiling duha ka lanes alang na sa mga motorista aron hanoy ra ang dagan sa trapiko.

Gitan-aw lang nila nga kritikal atol sa parade mao ang mga intersection nga agian sa parade.

“In case mo-cross og intersection, nagsabot nami nila nga kon naay lull sa ilang parade, among papadayonon og tabok ang sakyanan. Kon tapok gani then we’ll stop ang mga vehicles ana lang ba, banosbanos,” sigon ni Nimor.

Dugang niya nga wa silay gihimong re-routing ug wa silay gipangsirado nga dalan alang aning kasaulogan.

Tungod sab sa kadaghang tawo nga motambong sa kasaulogan, si Pastor Wilson Feria, nangulo sa seguridad sa Jesus Reigns, mihangyo sa mga manambong nga di magdala og backpack.Apan kon di kini malikayan nga adunay magdala og backpack, ipaubos kini nila sa hingpit nga inspeksyon.