Labella mireorganisar sa peace and order council

Upat dayon ka mga resolusyon ang giaprubahan sa unang tigom sa pag-reorganize sa Cebu City Peace and Order Council Martes sa hapon, Nobiyembre 26 sa conference room sa mayor’s office.

Gipangulohan kini ni Mayor Edgardo Labella, isip chairman, uban ang taga Department of the Interior and Local Government (DILG 7), kadagkuan sa Cebu City Police Office, Central Command (Centcom), Philippine Drug Enforcement Agency (PDEA7) ug uban pa nga naglangkob sa CPOC.

Gitug-an ni Labella nga kini aron masulosyunan ang unang natuki labot sa mga pamaagi nga mopasar na ang CPOC sa dakbayan sa Sugbo, human nga sa niaging duha ka tuig hagbong kini sa POC Performance Audit sa DILG.

Sa 2017, ang national passing rate alang sa mga siyudad, 62.45 apan, ang Cebu City ang anaa lang grado nga 21.40.

Hagbong gihapon kini sa 2018, kansang grado 58.69, kay ang passing rate 80.16.

Ang mga resolusyon nga ilang gipasar dayon sa unang panagtigum mao ang ‘Creating Special Action Committees on Anti-Insurgency and Preventing

Violent Extremism, Anti-criminality, Public Safety and Crisis Management.

Giaprubahan usab ang mga resolusyon nga alang sa katukuran sa Peace and Order and Public Safety Plan Technical Working Group.

Lakip na ang ‘Adopting the Bureau of Jail Management and Penology, Bureau of Fire

Protection and National police Commission as members of the City Peace and Order Council.

Lakip sa resolusyon nga quarterly ang ilang himuon nga tigum alang sa CPOC.

Giangkon ni Labella nga sa report, way problema sa insurgency sa Siyudad sa Sugbo apan, anaa gihapon ang problema sa ginadil nga drugas.

MARIE DUMABOC ■ UNANG TIGOM: Ubos sa liderato ni Mayor Edgardo Labella, mapaabot aktibong peace and order council nga mipahigayon sa unang tigom human sa reorganisasyon./FE