Pag-demolish sa mga balay wa madayon
Wa nadayon ang clearing operation ug pag-demolish sa kabalayan sa Sitio Avocado, Barangay Lahug, Siyudad sa Sugbo kay way mapakita nga court order ang demolition team nga gikuha sa University of the Philippines Cebu.
Ang unang demolisyon nahitabo niadtong Agosto 7, 2019 apan, ang mga lumolupyo nagtukod og mga tolda sa lugar.
Ang luna gipanag-iya sa UP ug adunay 36 ka mga balay niini ug dul-an sa 40 ka mga pamilya ang nagpuyo.
Sa pag-abot sa Sunstar Cebu sa lugar, wa na pasudla sa demolition team ang mga residente sa luna.
Ang uban nga nahibiling residente nga anaa sa sulod gipang-alihan ang ilang mga tent ug anaay uban usab kanila nga nag video sa panghitabo.
Si Eliseo Gulfan Jr., 60, presidente sa Sitio Avocado People Organization Inc. niingon nga di sila mosugot nga gub-on ug sila papahuwaon kon walay mapakita nga court order.
“Mosugot ra unta mi kon naa silay mapakita nga court order. Motabang pa gani mig alsa pero wala man. Kaduha na ni nilang gibuhat nga moaksyon ug demolish bisag walay court order,” saysay niya. Dungag niya nga anaa silay order nga gikan sa korte nga kasamtangan nga ipahunong ang pag demolish sa ilang mga balay tungod sa usa pa ni ka pending order ug di ni angay hilabtan.
Sigon ni Robert Barquilla, representante sa Cebu City Office of the Mayor nga way gi isyu nga court order nga adunay ipahigayon nga clearing operations ug i-demolish. “Walay court order. In fact gihold na siya. Nya ang UP wala pud nakakuha og restraining order nga atong i-hold nga in abeyance,” saysay niya.
Nag-abot ang kadagkoan sa UP ug hepe sa Mabolo Police Station kon unsay lakang nga pagahimuon./