Mithi sa pagdaginot
Makalipay. Makabilib nga taho nga dako og nadaginot ang bag-ong administrasyon ni Mayor Edgardo Labella sa dakbayan sa Sugbo, diin nilingkod lang sa pwesto niadtong Hunyo 29 ning tuiga human sa makabuhong mayoriya sa mid-term elections niadtong Mayo 13 sa samang tuiga.
Apan wala kita masayod sa kinatibuk-ang nadaginot sa Siyudad. Labaw na kon ang maong savings sulod lang sa iyang bagong administrayon o apil ba ang nadaginot sa pagdumala ni kanhi mayor Tomas Osmeña.
Atong gibasihanan sa pag-ngon nga dako ang nadaginot sa Dakbayan mao kadtong pagbuto sa taho nga dako og madawat nga Christmas bonus sa mga kawani sa Cebu City. Dili tiaw, P20 mil ang matag usa (patas tanan). Sa kinatibuk-an mobalor kini og dili mominos P100 milyunes.
Dili kita supak sa pagkagalante ni Labella sa paghatag sa bonus. Pangandoy kini sa tanang kawani, dili ba? Gani, nalipay kita labi na alang sa atong mga kaila nga nagtrabaho sa City Hall.
Nakanegatibo lang niini mao ang pagkabutyag nga mas daghan pang prayoridad nga bayranan ang Dakbayan sa sama sa P17 milyunes nga balayranan sa kuryente sa Dakbayan matag buwan sa Visayan Electric Company (Veco). Lain pa, problema sa drainage nanginahalan og dugang budget ug uban.
Mas samot nga dili maayo kon ang naasoy nga savings o nadaginot gikan pa sa admistrasyon ni Osmeña. Kon mao man gani, makaingon kita nga maayo lang kita manaway sa naulahi apan wala pay tuig sa atong pangatungdanan, sama gikaon na ang mga maanindot nga pulong panahon sa kampanya?
Pila gyud ang savings? Panahon nga kini natigom? Nganong nakadaginot? Basin wala lang gipatuman ang ubang programa aron makadaginot. Hinaut nga magpadayon ang hayag nga Pasko uban sa mabulukong mga suga sa kadalalan ug plaza. Ang mithi sa pagdaginot dunay tukma nga panahon ug tumong.