Andam na ba kita batok sa ASF?
Unsay mahitabo kon makasulod gyod sa atong rehiyon ang gikaintapang African Swine Fever (ASF)? Pananglit, makasulod sa lalawigan sa Sugbo ang ASF, husto na ba ang atong pagpangandam batok niini?
Akong nahibaw-an nga wala maapil sa atong pagpangandam kining mosunod nga mga butang:
Una, hangtod karon, walay mga himan o mga instrumento ang mga LGU o bisan gani ang mga opisina nga dunay direktang kalambigitan sa kampanya batok sa ASF sama sa protective clothing, boots ug uban pa nga maoy isul-ob atol sa pagresponde kon dunay positibo nga resulta sa ASF.
Sumala sa biosecurity protocol, kausa ra gamiton ang himan o instrumento nga gigamit alang sa ASF.
Ikaduha, wala pa mahibaw-i og asa ibutang ang mga lubnganan sa mga baboy nga patyon kon dunay ASF. Asa man kini angay himoon? Unsa man kadako ug unsa kalawom ang maong lubnganan?
Ikatulo, unsa man ang paagi sa pagpatay sa baboy? Paligsan ba kini, lumsan ba kini, pusilon ba kini, pakoryentehan ba kini?
Dili mahimo nga dukdokon lang sa backhoe ang mga baboy aron mamatay kay dunay balaod nga gitawag og Animal Welfare Act.
Sumala sa akong nahibaw-an, ang pagpakuryente sa baboy maoy usa ka paagi nga matawag og wala makalapas sa Animal Welfare Act.
Sa akong nahibaw-an, wala pa maapil sa atong inbentaryo ang maong instrumento sa pagpakoryente sa mga baboy.
Nasayod na ba ang atong mga beterinaryo sa lungsod, siyudad o probinsiya kon pila ka buok ang gibuhi nga mga baboy sa mga gitawag og backyard raisers?
Nasayod na ba sila kon asa mahimutang ang maong mga baboyan? Nasayod na ba sila kon asa gihipos o gilabay ang mga hugaw sa baboy sa maong mga baboyan?
Nasayod na ba sila kon unsa nga mga karsada ang kinaduolan sa maong mga baboyan?
Nganong importante man kini? Aron dali ra kaayo sila maka-monitor ug maka-moresponde kon dunay balita bahin sa ASF sa maong mga lugar.
Unsa may buhaton aron mokooperar o kaha motabang ang ubang mga magbubuhi og baboy kon pananglit pamatyon na ang mga baboy nga positibo sa ASF?
Unsaon paglikay nga dili nila kini ibaligya o kaha ipayuhot sa ubang lugar aron dili maapil sa pagpatay ang mga baboy sa ilang kasilinganan?
Kalabot niini, nasayod na ba ang atong mga kadagkoan kon pila ka buok ang gitawag og biyahedor o negosyante sa baboy sa ilang lugar?
Ila na ba nga gitawag o giapil sa meeting ang mga biyahedor sa baboy aron maapil sa pagpangandam batok sa ASF?
Kalabot niini, unsa ka epektibo ang gihimong kampanya batok sa ASF?
Dili ba kaha angayan nga iapil ang DepEd bahin niini aron mismo ang mga kabataan nga mga estudyante moapil sa pagpasabot sa ilang mga ginikanan kalabot sa kampanya batok sa ASF?
Kanus-a man molihok ang mga kadagkoan kon dunay baboy nga mamatay sa ilang lugar? Hulaton pa ba nga dunay confirmatory result gikan sa buhatang rehiyon o kaha gikan sa Manila o molihok na dayon sila kon dunay balita sa pagka-matay sa baboy nga sama sa Hog Cholera?
Kataposang pangutana – unsaon man pagtratar ang balita bahin sa pagkamatay sa baboy, itago ba o ipahibalo dayon kini sa atong local media?